Lehen Hezkuntza eta DBHko 150 ikasle baino gehiago bildu ditu Bilbon Be Zientzia azokaren lehen edizioak

Achucarro Neurozientziako Ikerketarako Euskal Zentroak, BC3 Klima Aldaketari buruzko Ikerketarako Euskal Zentroak eta BCAM Matematika Aplikatuko Euskal Zentroak Be Zientzia azokaren lehenengo edizioa egin dute ostiral honetan Bilboko Zabalguneko eraikinean, eta hiriko bi ikastetxetako Lehen Hezkuntzako eta DBHko 150 ikasle baino gehiago bildu dituzte, jarduera interaktiboz eta zientzia modu dibertigarri eta didaktikoan hurbiltzeko diseinatutako tailerretan parte hartzeko.

Antolakuntzatik jakinarazi dutenez, Be Zientzia azokaren lehen edizioan "gogotsu" parte hartu dute ikasleek eta irakasleek, eta askotariko jarduerez gozatu ahal izan dute, hala nola estatistika, kalkulu jokoak, papiroflexia logikoa, banana baten DNAren esplorazioa eta ping pong-eko pilotekin egindako karbono aztarnaren kalkulua.

Ikasleek askotariko gaiei buruz ikasi dute hiru zentro antolatzaileetako ikertzaile garrantzitsuek emandako tailer praktikoen bidez, besteak beste, klima aldaketari buruz, garunak animalia espezie ezberdinetan duen bilakaerari buruz eta matematikei buruz.

Gainera, goizean zehar, Kontxi Claver Bilboko Udaleko Ekonomiaren Garapen, Merkataritza, Enplegu eta Turismo zinegotziak eta Javier Garcinuño Bilbao Ekintza udal sozietateko zuzendari nagusiak azoka bisitatu dute, "Bilbok zientziarekin eta berrikuntzarekin duen konpromisoa indartuz".

"Eskerrak eman nahi dizkiegu parte hartu duten ikastetxeei, bai eta ikertzaile eta antolatzaile talde osoari ere, elkarrekin egindako lanari esker, laster errepikatuko delakoan baikaude", adierazi dute Achucarro, BC3 eta BCAM erakundeetatik.