Euskal Autonomia Erkidegoko (EAE) ekonomiak azken 14 hilabeteetako erregistrorik onena izan du maiatzean, 97,4 puntuko balioarekin, hau da, aurreko hilean baino sei puntu gehiago (apirilean 91,4 puntu). Hobekuntza horrek ahalbidetu dio euskal ekonomiari hazkunde solidoko eremura hurbiltzea (100 puntutik aurrera dago finkatuta), 2023ko martxotik hazkunde leuneko eremuan egon ondoren, Eusko Jaurlaritzako Ekonomia eta Ogasun Sailak egindako termometroaren arabera.
Hala, eta ildo horretatik jarraituz, iturri berberak jakinarazi duenez, barne eskariaren hazkundea sendoa izan da berriz ere, eta, aldi berean, esportazioak nabarmen hobetu dira. Horrek esan nahi du kanpo saldoak berriro ere ekonomiaren hazkundean ekarpena egiten duela.
Maiatzeko Gizarte Segurantzako afiliazio datuek "oso irudi positiboa" utzi dute
Hain zuzen, zerbitzuen sektorearen dinamismo handiak azaldu du, eskaintzaren ikuspegitik, produkzioak eta enpleguak izandako hazkundearen zati handi bat. Izan ere, maiatzeko Gizarte Segurantzako afiliazio datuek "oso irudi positiboa" utzi dute, %1,7ko urte arteko tasarekin, aurreko hileko bera, eta marka berria lortuz 1.019.200 afiliazioak gaindituta (dagoeneko zortzi hilabete dira jarraian milioi bat kotizazio gainditu direla). Industriak izandako jarduera txikiagoa orekatu zuten hobekuntza horiek.
Ekonomiaren termometroa hilero egiten da, euskal ekonomiaren 100 adierazle baino gehiago oinarri hartuta, eta hilabete bakoitzaren lehen egunetan argitaratzen da, ondorioztatu dute Eusko Jaurlaritzatik.
