Donostiako Udalak Alderdi Ederreko haur parkea berritzeko lanak hasi ditu, 30.000 euroko aurrekontuarekin

Donostiako Udalak aste honetan ekin die Alderdi Ederreko haur-parkea berritzeko lanei, instalazioaren segurtasuna bermatzeko beharrezko jarduketa baita. Lanek 30.000 euro inguruko aurrekontua dute, gehi BEZa, eta segurtasunez egin ahal izateko, parkea itxita egongo da astearte honetatik.

Lanek lau eta bost aste bitarteko iraupena izango dutela aurreikusi da, espazioa udako denboraldiaren atarian erabat erabilgarri egon dadin, Donosrtiako Udaletik jakinarazi dutenez.

Alderdi Ederrekoa hirian gehien erabiltzen den jolasguneetako bat da, eta elementu batzuk oso hondatuta zeuden: euskarri herdoildu batzuk, panel hautsiak eta segurtasun zoladura hautsita zenbait tokitan.

Horrela, jarduketaren barruan sartzen dira dauden bi joko anitzak erabat desmuntatzea (egiturazko zutoinak bakarrik mantenduz), elementuak tailerrera eramatea konpontzeko edo pieza berriak fabrikatzeko (panelak, barrak eta plataformak), jolasak berriz instalatzea malguki motako bi elementu berri gehituz, eta joko eremu osoan segurtasun zoladura osorik berritzea hondatutako eremuak ordezkatuz.

Prozesuaren zati batean, batez ere tailerreko lanen fasean, litekeena da haur parkean jarduera ikusgarririk ez egotea, eta hori esku hartzearen garapen teknikoari berari dagokio.

Donostiako Udala jakitun da jarduerak eragin handia izan dezakeela oso erabilia den espazio batean, baina ezinbesteko esku hartzea dela deritzo ekipamenduaren segurtasuna eta kalitatea bermatzeko. Jarduera honekin, berretsi egiten du espazio publikoak mantentzeko eta hobetzeko konpromisoa, batez ere haurrentzat direnak.