Ensemble Phantasy taldeak 'Musika txekiarra' emanaldia eskainiko du larunbatean Miramongo Matineetan

Miramongo Matineeak Euskadiko Orkestraren ganbera musikako zikloaren beste emanaldi bat izango da larunbatean, apirilaren 11ean, eta Ensemble Phantasy taldeak eskainiko du, Musika txekiarra izenburupean. Ohi bezala, kontzertua Euskadiko Orkestraren Donostiako egoitzan izango da.

Antolatzaileek jakinarazi dutenez, Ensemble Phantasy taldeko bederatzi interpreteak Euskadiko Orkestrako kideak dira: Virgile Demillac (biolina), Monika Mazur (biola), Gabriel Mesado (biolontxeloa), Marc Sirera (kontrabaxua), Oihana Kontxeso (flauta), Pascal Laffont (oboea), Sara Zufiaurre (klarinetea), Yuan Dai (fagota) eta Alvaro Parron (tronpa).

Txekiar kultura herrikoian sakon errotuta egon arren, musika lengoaia oso desberdinak hartu zituzten hiru konpositore txekiarren lanak entzun ahal izango dira kontzertuak, eta XX. mendeko txekiar musikaren aurpegi anitzak nabarmenduko ditu, batik bat, neoklasizismoa, erradikaltasuna eta nostalgia.

Horrela, Alois Habaren 4. Nonetoa lanarekin hasiko da emanaldia, seguruenik Matinee honetako lanik abangoardistena. 1964an konposatu zuen, eta heldutasun handiko obra da. Musikagilea Schoenberg eta Busoniren eredu vienarretatik askatu zen, musika hizkera oso pertsonala garatzeko.

Jarraian, Alois Habaren ikasle Gideon Kleinek Theresienstadteko kontzentrazio esparruan 1944an konposatu zuen Harirako trioa entzungo da. Bere lehen obretako ausardia modernistetatik urrun, Klein lengoai klasikoago batera itzuli zen obra honetan, moraviar folklorearekin lotua. Klein urtebete geroago hil zuten Holokaustoan.

Azken lana Bohuslav Martinuren 2. Nonetoa izango da, bere ibilbide artistikoaren gailurra, erbesteratzearen ondorioz konpositore frantsesen eragina eta bere txekiar sustraiekiko atxikimendu handia uztartzen dituena. Lengoaia neoklasikoa du, Moraviako dantza tradizionalek koloreztatua.

Kontzertua 11:00etan hasiko da eta sarrerak 11 euroan salgai daude euskadikoorkestra.eus webgunean eta Kursaal Auditoriumeko leihatilan; orkestraren egoitzako leihatilan bertan ere erosi ahal izango dira kontzertuaren egunean, leku librerik geratzen bada.