Donostiako Udalak 'Zure Hiria Zaintzen' programaren edizio berria hasi du eta Egiako 100 bat ikaslek hartuko dute parte

Donostiako Udalak 'Zure Hiria Zaintzen' programaren edizio berria jarri du martxan, haurrei hiria gerturatzeko eta herritar kritiko eta erantzunkide gisa duten parte hartze aktiboa indartzeko helburuarekin, eta Egia auzoko ikastetxeetako Lehen Hezkuntzako 100 bat ikaslek parte hartuko dute.

Udalaren arabera, Donostiak "hiri hezitzaile gisa duen konpromisoa" indartzen du ekimenak. Eredu horretan, hezkuntza udal proiektu politikoaren funtsezko ardatz bat da, ikaskuntza formalaz haraindian doan zentzu zabalean ulertuta, eta familiak eta eskolak funtsezko zeregina betetzen jarraitzen dute.

Iñigo Garcia Hezkuntzako eta Gazteriako zinegotziak programaren balio pedagogiko eta soziala azpimarratu ditu aurkezpenean: "'Zure Hiria Zaintzen' ekimenarekin, Donostiako haurrek betetzen duten funtsezko eginkizunaren balioa azpimarratu nahi dugu. Haiek dira, euren begirada garbi, bitxi eta kritikoarekin, hiria ikuspegi berrien arabera ulertzen laguntzen digutenak eta Donostiako etorkizuna ere haien eskuetatik igarotzen dela gogorarazten digutenak".

Iaz, Amara Berriko 360 ikaslek parte hartu zuten programan. Edizio honetan, aldiz, Egia auzoko 100 ikaslek hartuko dute parte, Sagrado Corazon Mundaiz, Presentacion de Maria eta Maria Reina Eskola ikastetxeetako LH5 eta LH6 mailetakoek, hain zuzen ere.

Ekimena bi fasetan garatuko da. Lehenengoan, Donostiako Udaleko Hezkuntza atalak unitate didaktiko bat landu du, dagoeneko ikastetxeetan jorratzen ari direna. Ondoren, udaletxera bisita gidatua egingo da, otsailaren 9an eta 10ean, 10:00etatik 11:30era.

Bigarren fasean, ikasleek ikasitakoan oinarritutako marrazkiak egingo dituzte, eta Cristina Enea parkeko erakusketa aretoan jarriko dira ikusgai martxoaren 25etik apirilaren 24ra.

Lau sari kolektibo emango dira, teknika artistiko onenari, eduki onenari, goiburu onenari eta originaltasunari, alegia. Hala, ekimenean parte hartzen duten ikasgela guztiek sari horietako bat jasoko dutela bermatuko da.

Garciak azpimarratu duenez, "proiektu honen bidez lortu nahi duguna da ikasleek euren hiria eta bertako erakundeak, historia zein balioak hobeto ezagutzea, eta ikasleen parte hartze aktiboa eta arduratsua sustatzea, gaur egungo herritar gisa, ez etorkizuneko herritar gisa bakarrik. Haurrek hiria eurena ere dela sentitzen dutenean, zaindu, errespetatu eta eraldatu egiten dute".