Gipuzkoako Foru Aldundiak 2026. urterako bi laguntza deialdi berri onartu ditu astearte honetan Elkar-Ekin Lanean estrategiaren esparruan, lurraldearen kohesio soziala indartzeko eta lan merkatuan sartzeko zailtasun handienak dituzten pertsonentzat kalitatezko enplegu aukera errealak sortzeko.
Irune Berasaluze Gipuzkoako Aldundiko bozeramaileak gobernu bileraren osteko prentsaurrekoan adierazi duenez, "Elkar-Ekin Lanean tresna estrategikoa da Gipuzkoa kohesionatuago eta bidezkoago baterantz aurrera egiteko, non hazkunde ekonomikoa kalitatezko enpleguaren eta gizarteratzearen eskutik joango den", nabarmendu du Berasaluzek.
Bada, alde batetik, foru gobernu kontseiluak argi berdea eman dio Elkar-Ekin Lanean programaren inbertsio laguntzen eta bideragarritasun proiektuen lerroaren 2026ko deialdiari, Gipuzkoan laneratzeko enpresak sortzea eta mantentzea bultzatzeko.
Deialdiak 600.000 euroko zuzkidura du, eta lurraldeko gizarte ekonomiaren sarea indartzea du helburu, jarduera ekonomikoa eta bazterketa egoeran edo arriskuan dauden pertsonei zuzendutako gizarteratze eta laneratze prozesuak uztartzen dituzten enpresa proiektuak babestuz.
Halaber, gobernu kontseiluak Lehen Enplegu programaren 2026ko deialdia ere onartu du, Elkar-Ekin Lanean ibilbide profesionaletako batean parte hartu duten migratzaileak kontratatzeko. Laguntza lerroak 400.000 euroko zuzkidura du, eta egoera bereziki ahulean dauden migratzaileei enplegua lortzen laguntzera bideratuta dago, enpresek zuzenean kontratatuta. Laguntzak lehiarik gabeko prozedura baten bidez emango dira.
BALORAZIOA
Berasaluzek adierazi duenez, "bigarren erabaki honek pertsonekin eta enpresekin aldi berean lan egiten duen Elkar-Ekin Lanean erakundearen logika integrala osatzen du".
"Migratzaileei prestakuntza ibilbideetan laguntzea eta, ondoren, lehen enplegua erraztea funtsezkoa da eredu ekonomiko gizatiarrago, inklusiboago eta Gipuzkoako balioekin lerrokatuago baterantz aurrera egiteko", azaldu du.
Ildo horretan, azpimarratu duenez, "aukerak sortzen dituzten, lurraldearen kohesio soziala indartzen duten eta enpresei talentua eta konpromisoa txertatzen laguntzen dieten politika publikoak dira".
