Monday Potions, Nightwaves, Jonsor eta Laztana Laztana dira 7. Hiriko Soinuak lehiaketaren irabazleak

Monday Potions (sari nagusia), Nightwaves (Barakaldoko artistarik onena), Jonsor (BBK-Berdintasun saria) eta Laztana Laztana (euskarazko artistarik onena) dira Barakaldoko Udalak (Bizkaia) sustatutako Hiriko Soinuak lehiaketaren zazpigarren edizioko irabazleak.

Antolatzaileek jakinarazi dutenez, finala irailaren 27an izan zen Barakaldoko San Bizente parkean eta 450 pertsona inguru bertaratu ziren. Bederatzi artista aritu ziren: Del Val, Deriba eta Monday Potions, kategoria nagusiko finalistak; Ardo Beltza, Clara Corral & Cute Canallas eta Nightwaves, Barakaldoko artistarik onenaren kategoriako finalistak; Alas Glow, Jonsor eta Naz, BBK-Berdintasun sariko finalistak.

Emanaldiak amaitzean, eta epaimahaiaren deliberazioaren ondoren, kategoria horietako irabazleak jakinarazi ziren, baita euskarazko artista onenarena ere: Laztana Laztana.

Saritutako lau proposamenak Barakaldoko Herriko plazan egingo den Hiriko Soinuak doako jaialdian arituko dira urriaren 24an eta 25ean: Laztana Laztana eta Monday Potions taldeek Biznaga eta Bala taldeekin partekatuko dute oholtza hilaren 24an, eta eta Jonsor eta Nightwaves Reincidentes eta Sandré taldeekin ariko dira hilaren 25ean.

BESTE GAI BATZUK

Bestalde, Aspace Eguna 2025 ospatuko da Donostian igandean, urriaren 4an, 'Mugarik gabeko inklusioa' lelopean, eta Donostiako Orfeoiak, Musikene ikastegiak eta Euskadiko Orkestrak Aspalagun 2025 Saria jasoko dute. Gainera, martxa bat, bazkaria eta adin guztietarako jarduerak izango dira egunean zehar, tartean musika, karaokea, puzgarriak eta zozketa ugari.

Sustatzaileek nabarmendu dutenez, Aspace Eguna "erreferente" bilakatu da jada Gipuzkoan, eta bere helburu nagusiak dira garun paralisia duten pertsonen eta haien familien errealitatea ikusaraztea eta inklusioarekiko, aukera berdintasunarekiko eta aniztasunarekiko errespetuarekiko gizartearen konpromisoa indartzea.

Horrela, Aspace Eguna sortu zenetik, jardunaldiak sentsibilizazioa, kultura, musika eta kirola uztartu ditu, herritar guztiei irekita dagoen gune parte hartzaile batean.