BBK-k Bilbora ekarri du Daan Roosegaarderen 'Waterlicht', berotze globalaren inguruan kontzientziatzeko artelana

BBK-k Daan Roosegaarde artista herbeheretarraren Waterlicht artelana aurkeztuko du Bilbon ostegunetik larunbatera, irailaren 18tik 20ra, Amsterdam, Paris, Dubai edo New Yorketik igaro ostean. Murgiltze lan bat da, artea eta teknologia uztartzen dituena uholde birtual bat birsortzeko, kasu honetan Itsasmuseum museoaren zabaldegian, klima aldaketaren eraginaz hausnartzera eta planetarekin erlazionatzeko dugun modua birpentsatzera gonbidatuz.

BBK-ko arduradunek jakinarazi dutenez, led argiak, lente optikoak eta programazio sistema konplexu bat erabiliz, Waterlicht obrak aukera ematen dio publikoari esperimentatzeko klima aldaketaren aurrean jarduten ez badugu uraren maila zenbat igo daitekeen. Ikuskizunak "edertasun bisual handia" du eta "ingurumen krisiari buruzko arreta deia" da.

Waterlicht esperientzia kolektibo bat da, eta BBK-k ingurumen jasangarritasunarekin eta klima aldaketaren aurkako borrokarekin duen konpromisoa islatzen du. Banku fundazio gisa hamar urte bete dituela eta, 2025ean BBK garatzen ari den programazio bereziaren barruan kokatzen da ekintza.

Gainera, 'Waterlicht' modu naturalean konektatzen da BBK Klimaren espirituarekin, proiektu horretatik bultzatzen baititu BBK-k klima aldaketari aurre egiteko benetako ekintzak, eta ingurumen hezkuntzaren eta berrikuntza jasangarriaren aldeko apustu sendoa ere islatzen du.

OBRARI BURUZ

Bilbora ekarrita, BBK-k berriro erakutsi nahi du "artea ere izan daitekeela gizartea eta ingurumena aldatzeko eragilea". Hain zuzen, naturarekiko harremanari "gertutik begiratzera" gonbidatzen du BBK Klimak proiektu sortzaileen bidez, eta Daan Roosegaarderen lanak "gure planetaren hauskortasuna sentiarazten digun hizkuntza bisual bihurtzen du ura".

Daan Roosegaardek berak bere obrari buruz azaltzen duenez, 'Waterlicht' "etorkizun hobe baterako aktibatzailea da, eta urarekin bizitzearen zaurgarritasuna eta indarra nabarmentzen ditu aldi berean".

Murgiltze obra ostegunean, ostiralean eta larunbatean izango da ikusgai Bilboko Itsasmuseum museoko zabaldegian, 21:30etik 00:00etara, eta sarrera doakoa izango da.