Donostiako Udalak Gros auzoko Secundino Esnaola eta Bermingham kaleen arteko bidegurutzeko lanak bukatu ditu. Aurrekontua 70.000 eurotik gorakoa izan da, eta ia 35.000 euro obra zibilari dagozkio, eta 14.500 asfaltoari, seinaleztapen horizontalari eta baranda berriei.
Carlos Garcia Donostiako Udaleko Hiri Mantentze eta Zerbitzuetako zinegotziak azaldu duenez, "bidegurutzeko galtzada espaloien kota berera igo da, eta 15 zentimetroko irtengunea erantsi zaio. Oinezkoen pasabideak lekuz aldatu dira, eta orain laburragoak dira eta espaloietako ibilbide naturalekin lerrokatuago daude".
Era berean, jakinarazi du espaloiak handitu egin direla belarrien bidez, zebrabideen distantzia laburtzeko, oinezkoentzako ikuspena hobetzeko era errepidearen zabalera murrizteko. Ondorioz, ibilgailuen abiadura murriztu behar da; hain zuzen, lanak izan diren eremu osoko abiadura muga orduko 10 kilometro da. Seinale bertikalak zein horizontalak instalatu dira, gidariei abisatzeko.
Bestalde, lanek ekarri dute motorrentzako aparkalekua berrantolatzea ere. Bihurguneetan jada ez da lekurik egongo, eta aurrerantzean zebrabideen aurretik egokitu diren eremuetan bakarrik aparkatu ahal izango dira. Bermingham kaleko pasabidearen ondoko aparkaleku laukizuzena bakarrik mantenduko da.
HELBURUA
Halaber, Secundino Esnaola kaleako zenbaki bikoitien aldean desgaitasuna duten pertsonentzat erreserbatutako plaza aldatu da eta aparkaleku berria jarri da.
"Lanen helburua beti izan da bide segurtasuna eta oinezkoen irisgarritasuna hobetzea zirkulazio handiko elkargune honetan, bai oinezkoentzat, bai ibilgailuentzat. Lehenengoa da, baina ez da azkena izango, horrelako ekintzek hiri mugikortasun jasangarria hobetzen laguntzen dutela uste baitugu", azaldu du.
