Bilboko Erraldoiak erakusketa zabalduko dute asteartean, uztailaren 1ean, Bilboko Mariaren Bihotza plazako aztarnategian, eta irailaren 14ra arte bisitatu ahalko da, goizez, asteartetik igandera, uztailaren 25ean eta 31n eta abuztuaren 15ean izan ezik, itxita egongo baita jaiegunak direlako.
Bilboko Udaleko iturriek jakinarazi dutenez, hiriko kaleetan zehar 40 urte baino gehiago daramatzatzen erraldoien historia eta sinbolismoa erakusten du egitasmoak. "Irudimen herrikoiaren funtsezko figura hauek urtero pizten dute umeen eta helduen ilusioa, Aste Nagusiaren aurretik", nabarmendu dute.
Sarrerak Berreginen Museoaren ohiko prezioan egongo dira eskuragarri eta museoan bertan edo aztarnategian eros daitezke. Erakusketarako sarrerak museora sartzeko ere balioko du, eta alderantziz. Prezio orokorra 3 euro izango da, eta taldeentzat, 1,5 euro pertsonako; pentsiodunak, aniztasun funtzionala dutenak, 12 urtetik beherakoak eta irakasleak doan sar daitezke.
Gainera, bisitariek Bilboko erraldoi eta buruhandiekin lotutako hainbat familia jarduera eta tailerretan parte hartu ahal izango dute.
BESTE DATU BATZUK
Iman erraldoia tailerra uztaileko ostegun guztietan egingo da, 12:00etan, eta 6 urtetik gorako umeek euren pislazko erraldoi itxurako imana sortzeko aukera izango dute, irudi tradizionaletan oinarrituta. Tailerra Berreginen Museoan egingo da, euro bateko prezio sinbolikoarekin. Talde bakoitzeko gehienez 15 haur onartuko dira eta izen-ematea museoko webgunean egin daiteke: www.bilbokoberreginenmuseoa.eus/eu
Halaber, Erraldoien Dantza lantegia egingo da uztailaren 4, 11 eta 18an, 11:30ean, Ondalan konpartsaren eskutik, aztarnategiaren kanpoaldean. Sarrera librea izango da, lekua bete arte.
Azkenik, uztailaren 8tik abuztuaren 31ra arte erakusketa bisitatzen dutenek gomazko erraldoi baten zozketan parte hartu ahal izango dute. Horretarako, erakusketari buruzko galdera erraz bati erantzun eta sarrerako kutxan utzi beharko dute erantzuna. Zozketa irailaren 3an egingo da.
