Bilboko Udalak 253.000 euro inbertituko ditu Isabel Gallego Gorria ikastetxeko gimnasioko estalkia berritzeko

Bilboko Udaleko Hezkuntza Sailak Errekalde auzoko Isabel Gallego Gorria HLHIko gimnasioko estalkia berritzeko lanak hasi ditu, eskola jarduerarik ez dagoela aprobetxatuz. Lanak egiteko 253.040,38 euroko inbertsioa egin beharko da (BEZ barne), lau hilabete inguruko egikaritze epearekin.

Lanen helburuak ikastetxeko instalazio zaharrak hobetzea eta eraikinaren egiturarako egokiagoak diren materialez hornitzea dira, Bilboko Udaletik jakinarazi dutenez.

Isabel Gallego Gorria HLHI Eskola Eraikuntzen Larrialdi Planaren esparruan eraiki zen 1971 eta 1973 artean. Bost hamarkadako bizitza erabilgarriaren ondoren, hainbat esku hartze egin dira eraikinean, urteetan zehar eraikuntza elementuen pixkanakako degradazioa lehengoratzeko.

Testuinguru horretan, gimnasioaren eraikinaren estalkiak estankotasuna hobetzeko aldizkako jarduketak behar izan ditu, hura estaltzen duten metalezko panelak konponduz. Bada, Hezkuntza Sailak erabaki du panel horiek erabat berritzea, "hiriko eskola publikoaren instalazioak hobetzeko", Eider Bilbao Hezkuntzako zinegotziaren hitzetan.

Azkenik, proiektuak aldageletan jardutea ere aurreikusi du, tipologia bereko beste ikastetxe batzuetan iragazketak saihesteko jada egindako obren antzera.

BILBO

Bestalde, Bilboko Benidorm kalea eta Etxezuribidea ibilgailuentzat itxiko dira datorren asteko egun batzuetan bidea fresatzeko, asfaltatzeko eta margotzeko lanak egiteko.

Hain zuzen ere, Bilboko Udalak jakinarazi duenez, espazio publikoa astelehenetik ostegunera itxiko da, ekainaren 30etik uztailaren 3ra, 09:30etik 18:30era, gutxi gorabehera.

Lanak bi fasetan egingo dira. Hasteko, astelehenean eta asteartean, ekainaren 30ean eta uztailaren 1ean, Benidorm kalea itxiko da zirkulaziorako, Agirre Lehendakaria etorbidearen eta Mediterraneo Itsasoa kalearen artean.

Jarraian, asteazkenean eta ostegunean, uztailaren 2an eta 3an, berriro itxiko da Benidorm kalea, baina Kanariar Uharteak kalearen eta Agirre Lehendakaria etorbidearen artean, eta gidariak Navarro Villoslada kaletik joan beharko dira.

Horren ondorioz, Etxezuribidea ere itxiko da, Madariaga eta Agirre Lehendakaria etorbideen artean, eta ibilgailuen zirkulazioa Familia Santua kaletik eta Madariaga etorbidetik bideratuko da.