Bilboko 47 ikastetxek hartu dute parte 2030 Eskola Agendaren Udal Foroaren 20. edizioan

Bilboko Udalak 2030 Eskola Agendaren Udal Foroaren 20. edizioa egin du ostegun honetan, eta, udal ordezkariekin batera, 2030 Eskola Agendan parte hartu duten hiriko 47 ikastetxe publiko eta pribatuetako irakasle eta ikasleak bildu dira udaletxean, hiriaren eta bere ingurunearen jasangarritasuna hobetzeko asmoz.

Bilboko Udsaletik jakinarazi dutenez, bilkuraren buru Nora Abete alkateorde eta Mugikortasun eta Jasangarritasuneko zinegotzia izan da. Zortzi ikastetxek ikasturtean zehar garatu dituzten eta auzoetan eragin positiboa izango duten jarduerak aurkeztu dituzte.

Zehazki, Deustuko Madre de Dios ikastetxea, Errekaldeko IES Eskurtze BHI, Otxarkoaga-Txurdinagako Kirikiño ikastola, Begoñako Angeles Custodios, Abandoko Calasancio, Basurtuko Zorroza, Abandoko Jesuitas eta Aldamiz APNABI Eskola izan dira ekimenak aurkeztu dituzten ikastetxeak.

SAIOAK

Saioan dinamizatzaile bat izan da, eta proiektuak defendatu dituzten ikasleak "hiriko zinegotzi" izan dira egun batez, talde politikoetako ordezkariek beren aholkulariak izanik. Aurkezpen bakoitzaren ondoren, zinegotzi gazteek proposamenak bozkatu dituzte, eta udalbatzak eta aholkulariek guztiak onartu dituzte.

Proposamen eta konpromiso horiek joan den otsailaren 13an Otxarkoagako udaltegian egindako Eskola arteko Foroan adostu ziren, Bilbon eragin positiboa izan dezaketen jarduerei buruz hausnartu ondoren.

Ikasturte honetan, 15. GJH landu da (Lurreko ekosistemen bizitza, hiri ekologia, hiri inguruko inguruneak). Horren helburua da lurreko ekosistemen erabilera jasangarria babestea, berrezartzea eta sustatzea, basoak modu jasangarrian kudeatzea, desertifikazioaren aurka borrokatzea, lurren degradazioa geldiaraztea eta alderantzikatzea eta gure auzo eta hirietako biodibertsitatearen galera geldiaraztea.

Osoko bilkura egin ondoren, erakusketa bat prestatu da Campo Volantin pasealekuan, ikastetxeetako ikasle batzuek ikasturtean landutako proiektuen panelak, argazkiak edo adibideak jarriz. 15. GJHarekin lerrokatuta aurkeztu diren lanen artean hauek daude: eskola baratzeak, biodibertsitatea eskoletako patioetan, hondakinen murrizketa eta bilketa edo biodibertsitatearen sustapena eta abar.

Gainera, Eskola Agendaren programaren esparruan, hiriko zenbait ikastetxek proposamenak landu dituzte ikasturtean, 15. GJHarekin lotuta, Bilboko ingurumena hobetzeko. Proposamen horiek udalari zuzenduko zaizkio eta parte hartze bidezko aurrekontuen prozesuan aurkeztuko dituzte.