Zinegoak jaialdiak Zero Chou zinemagile taiwandarrari emango dio 2025eko Ohorezko Saria

Ekainaren 23an Arriaga antzokian egingo den jaialdiaren 22. edizioaren inaugurazio ekitaldian jasoko du saria, eta, gainera, zinemagile taiwandarraren filmografiari buruzko atzerabegirakoa izango da, Taiwango Kultura Ministerioarekin lankidetzan antolatua.

Alaitz Arenzana Zinegoak jaialdiko zuzendariak adierazi duenez, "ohore bat da Zinegoak-entzat gure 2025eko Ohorezko Saria Zero Chouri ematea, Taiwango zinema garaikidean eragin eta konpromiso handienetakoa duen zinemagileari".

Bere "ausardia, talentua eta mugak gainditu, estereotipoak hautsi eta mundu bidezkoago eta inklusiboago bat sustatzen duen zinema sortzeko dedikazio nekaezina" aitortuko zaiola nabarmendu du.

Alaitz Arenzana Zinegoak jaialdiko zuzendariak adierazi duenez, "ohore bat da Zinegoak-entzat gure 2025eko Ohorezko Saria Zero Chouri ematea, Taiwango zinema garaikidean eragin eta konpromiso handienetakoa duen zinemagileari"

"Bere lana gizartea eraldatzeko tresna indartsua da, eta gure asmo sakonenen ispilu izan daitekeela erakusten duen adibide garbia da", gaineratu du.

Zero Chou (Keelung, Taiwan), Filosofian graduatua da Chengchiko Unibertsitate Nazionalean, eta kazetaritzatik hasi eta ikus-entzunezkoen zuzendaritzara arteko ibilbidea egin du. Bere lanik esanguratsuenen muina izango ziren gaiak aztertu ditu 1990eko hamarkadaren erdialdetik bere film laburretan, hau da, identitatea, maitasuna, justizia soziala eta queer eskubideak.

BESTE DATU BATZUK

Bere zinema moldeak eta generoak apurtzeko duen gaitasunagatik bereizten da, istorio errealistak eta intimoak drama historikoekin, thrillerrekin eta melodramekin uztartuz, betiere estetika bizi eta zainduarekin.

Chouren lana, bisualki txundigarria izateaz gain, queer esperientzien irudikapenarekin ere oso konprometituta dago, batez ere euren testuinguruan, non gai horiek oraindik ere erresistentzia eta kontserbadurismoari aurre egiten dioten.

Tongzhi trilogiak -'Splendid Float' (2004), 'Spider Lilies' (2007) eta 'Drifting Flowers' (2008)- berebiziko garrantzia izan du Asiako LGBTQ+ istorioak ikusarazteko. Film horiek "maitasun harremanetatik eta identitateetatik gizarte borroketaraino" heltzen dira, "mugak gainditzen dituen irudikapen eta enpatia espazio bat" sortuz. Zuzendariari eskainitako atzerabegirakoaren parte izango dira hiru lanak eta Bilbon ikusi ahal izango dira.

'Gloomy Salad Days' eta 'Because of You' telesailetan eta 'Project Rainbow in Six Asian Cities' bezalako nazioarteko proiektuetan ere lan egin du telebistan, publiko global bati queer esperientziak hurbiltzen jarraituz.

Bere ikuspegi artistikoak "ametsen esplorazioa eta errealitatea" uztartzen ditu, eta "espazio magiko eta batzuetan ilusiozkoak" sortzen ditu, "erretratatzen dituen bizitzaren edertasuna eta halabeharra islatzen dutenak".