BBK Artearen Ibilbidea egitasmoaren seigarren edizioa egingo da astearte honetatik abendura bitartean Bizkaiko 31 udalerritan, 'Istorioak' lelopean, eta, ibilbide heterogeneo eta askotarikoa eskainiko du mendebaldeko artean zehar, historian zehar izaera eta jatorri ezberdineko iturri literarioetan inspiratu diren egileekin.

Bilboko Arte Ederren Museoak BBK Fundazioaren eta udal parte hartzaileen laguntzarekin antolatutako ekimenaren aurkezpena astearte honetan izan da, eta bertan egon dira, besteak beste, Elixabete Etxanobe Bizkaiko diputatu nagusi eta Bilboko Arte Ederren Museoko Patronatuko presidentea, Gorka Martinez BBK Fundazioko zuzendari nagusia, Nora Sarasola BBK Fundazioko Obra Sozialeko zuzendaria eta Miguel Zugaza Bilboko Arte Ederren Museoko zuzendaria.

Bada, BBK Artearen Ibilbidearen seigarren edizioan, 'Istorioak' leloak hainbat artistaren eta hainbat garai eta teknikatako 38 artelanen aukeraketa bideratu du -pintura, collage, akuarela, eskultura, kartel, argazkigintza eta bideoa-, eta Jose Luis Merino Gorospe Bilboko Arte Ederren Museoko Antzinako Arteko kontserbadorea izan da komisarioa.

"Arteak era guztietako historiak bisualki adierazteko duen gaitasunean eta museoko bildumen aberastasunean oinarrituta, BBK Artearen Ibilbidearen proposamen berriak ibilbide heterogeneo eta askotarikoa eskainiko du mendebaldeko artean zehar, historian zehar izaera eta jatorri ezberdineko iturri literarioetan inspiratu diren egileekin", azaldu dute aurkezpenean.

BESTE DATU BATZUK

Museoko bildumako obrak "fideltasun handiz" erreproduzitzen dituzten panelek osatzen dute erakusketa, eta aurten, besteak beste, Lucas Cranach 'Zaharra', Martin de Vos, Isabel Baquedano, Idoia Monton, Francisco Durrio, Orazio Gentileschi, Jose Echenagusia, Mari Puri Herrero, Pedro Orrente, Sofonisba Anguissola, Andres Nagel, Ana Laura Alaez eta Itziar Okariz artisten lanak ikusi ahalko dira.

Irudiekin batera, lan bakoitzaren iruzkinak irakur daitezke euskaraz eta gaztelaniaz, eta ingelesezko bertsioarekin ere doan deskarga daitezke QR kode baten bidez.

Gainera, museoko Hezkuntza eta Kultur Ekintza saileko Maria Victoria Antoñanzasek eta Cesar Ochoak egindako bitartekaritza programa bat eskaintzen du ekimenak, bisita gidatu eta komentatuak antolatuz ikastetxe eta kultura elkarteentzat, bai eta erakusketa ikustera hurbiltzen direnen kontsultei erantzunez ere.

BBK Artearen Ibilbidea programak Bilbon hasi du seigarren edizioa, astearte honetan, eta Durangon bukatuko du, abenduaren 7an, Bizkaiko 31 herritan ibilbidea eginez.