Euskal Herriko zortzi ikaslek, Bizkaiko lauk, Arabako bik eta Gipuzkoako beste bik, La Caixa Fundazioaren beka bat jaso dute atzerrian graduondoko ikasketak egiteko. 2022ko deialdian 100 unibertsitario hautatu dituzte.
La Caixa Fundazioak jakinarazi duenez, erakundearen 41. beka-programaren helburua da ikasle "bikainenen" talentua sustatzea, "munduko unibertsitate onenetako batzuetan prestakuntza handituz".
Madrilgo CaixaForum-en egindako ekitaldi batean eman dira bekak. Ekitaldian izan dira, halaber, Gobernuko lehen lehendakariordea eta Nadia Calviño Ekonomia Gaietarako eta Eraldaketa Digitalerako ministroa, Joan Subirats Unibertsitate ministroa eta La Caixa Fundazioko lehendakariordea, Juan José López Burniol.
Emandako 100 bekak lau kontinentetan banatuta daude: 58 beka Europan ikasteko dira, 40 Ipar Amerikan ikasteko, bata Asian ikasteko eta bestea Ozeanian ikasteko. Estatu Batuek (35) eta Erresuma Batuak (34) erakartzen dituzte bekadun gehien.
2022ko promozioko 100 bekadunak Espainiako 28 probintziatakoak dira, lau barruti portugaldarretakoak eta beste bost herrialdetakoak. Bekadun gehien dituzten probintziak Bartzelona (26), Madril (12), Coruña (4), Bizkaia (4) eta Valentzia (4) dira. Bekadunen batez besteko adina 25,9 urtekoa da (beka jasotzeko unean).
Bekadun gehien jasotzen dituzten unibertsitateak hauek dira: University of Oxford (7), University of Cambridge (6), ETH Zürich (6), Columbia University (5), Imperial College London (5), The London School of Economics and Political Science (5) eta Massachusetts Institute of Institute (4).
Gehien ordezkatutako diziplinak ingeniaritzak eta teknologiak (17), matematika (10), zuzenbidea (7), ekonomia- eta enpresa-zientziak (7) eta medikuntza- eta osasun-zientziak (6) dira.
