15 eta 25 urte bitarteko hogei gaztek Parkeando aurkeztu dute aste honetan, Gesaltza Añanako Gatz Haranan, eta uztailaren 1ean eta 2an aurkeztuko dute Pobesen eta Kuartangon. Oreka, malabar, akrobazia eta jauzien ikuskizun bat da, sokekin, herritar orori zuzendua. Artistek diziplina horiek gizarte-zirkuaren tresnarekin jartzen dituzte praktikan, eta, haien bidez, garapen pertsonalerako eta sozialerako, autoestimurako, adierazpenerako eta komunikaziorako bide ematen da. Pertsona horietako batzuek aniztasun funtzionala dute.
2017an sortu zenetik, Azirkartek gizarte-zirkuarekin lan egiten du. Irabazi-asmorik gabeko elkarte bat da, gizarte-bokazioa duten hezitzaileek eratua. Haren helburua da aniztasun funtzionala duten pertsonek jarduera fisikoetan eta kirol-arlokoetan parte hartzea eta haietan murgilaraztea, kolektibo horren ahalmena ezagutzera ematen lagunduko duten ekintzak sustatzea eta praktika horiek sustatu ahal izateko beste erakunde batzuekin akordioak ezartzea.
“El sauce llorón” izan zen Azirkarteren lehen ikuskizuna; “Parkeando” da bigarrena. Lan horietan antzezpenean dihardutenek eszenografia, musika eta arropa sortzen parte hartu dute. Azirkarte elkarteko Oscar Ruiz de Azua sortzailekidearen hitzetan, “gizarte-zirkuak agerian uzten du pertsona horiek malabarrak, akrobaziak, orekak edo trapezioa egiteko gai direla, eta xede duten guztia lor dezaketela”.
Gizarte-zirkuko troupeak 19:30ean egingo du ikuskizuna, uztailaren 1ean, Pobesen igerilekuaren ondoan dagoen pilotalekuan. Zuhatzu Kuartangoko showa igandean izango da, uztailaren 2an, 18;00etan, igerilekuaren ondoan. Gainera, nahi duena taldearekin joan ahalko da oinez eta astoekin egingo dituzten joan-etorrietara.
Gazteak, hezitzaileak eta astoak egunero irteten dira goizeko 10:00etan. Larunbatean, Gesaltzatik Pobesera, eta igandean, Aprikanotik Zuhatzu Kuartangoraino. Aurten, honako hauek parte hartu dute proiektuan: Fundación Vital, Fundación Valle Salado de Añana eta Gesaltza Añanako, Pobeseko eta Kuartangoko udalak.
