Genero-indarkeriaren kasu berria

Ertzaintzako agenteek 29 urteko gizon bat atxilotu dute gaur goizaldean Bilbon, genero-indarkeriako delitu bat eta agintaritzako agenteen aurkako atentatuaren delitua leporatuta.

"Ertzainek premiaz esku hartu dute emakume bat, gizon batek etxean eraso egiten zion bitartean, oihuka laguntza eske ari zela ikustean", azaldu dute gaur Eusko Jaurlaritzaren Segurtasun sailetik.

Hala, eta ildo horretatik jarraituz, gaur goizaldeko 01:50ean, Bilboko Herritarren Babeseko lau ertzain etxe batera hurbildu dira abisu bati erantzunez, bikotekidea emakume bat etxean jotzen ari zela jakitera eman baitiete.

"Iritsi direnean, agenteek ikusi dute beheko solairuko etxebizitza bateko leihotik biktima oihuka laguntza eske ari zela gizon batek inguratzen eta indarrez heltzen zion bitartean, etxe barruan sartzeko. Egoera larri horren aurrean, ertzain-patruila zalantzarik egin gabe sartu da etxean leihotik, eta gizona erditik kendu eta erasoa geldiarazi du", azpimarratu dute bertatik.

Une horretan, "bere onetik irtenda zegoen gizonak agente bat jo du eta aurre egin die ertzainei". Azkenean, genero-indarkeriaren delitua eta agintaritzako agenteen aurkako atentatuaren delitua leporatuta atxilotu dute. Bi agentek kontusioak jasan dituzte.

Biktima ertzain batek artatu du, eta gero osasun-zentro batera eraman dute mediku arreta jaso zezan.

Atxilotuak aurrekariak ditu genero-indarkeriagatik, eta, Bilboko Ertzain-etxeko eginbideak amaitzean, Bilboko Emakumeen Aurkako Indarkeriaren Arloko Epaitegiaren eskuetan jarriko dute.