Ibaiondok, Goikolarrak, Zabalganak eta Salburuak ere bilketa pneumatikoko sistemaren bidez jasoko dituzte hondakin organikoak

Itxigailua duen edukiontzi marroi berriarekin bilketa egiteko eredua auzo guztietara hedatu ostean, hondakin organikoen kanpainak gaurtik, ostegunetik, aurrera, sistema bilketa pneumatikoa duten auzoetara (Ibaiondo, Goikolarra, Zabalgana, Salburua eta hirigune historikoa), ere zabalduko du. Horietan ere, ahoa HUT txartelarekin irekiko da modu pertsonalizatuan, edukiontzietan bezalaxe. "Gainera, auzo horietan zerbitzua hobetzeko eta bereizketa errazteko, Udalak bilketa-sistemen berrantolaketa egingo du. Hala, berritasun nagusien artean, orain arte edukiontzietan jasotzen zituzten ontziak, hemendik aurrera, aho pneumatiko bidez bilduko dituzte. Aldiz, errefusa edukiontzira aldatuko da", azaldu dute gaur Gasteizko Udaletik. “Oraindik zifra ofizialak emateko goizegi da, baina Udala eta hiriko konpostatze-instalazioak jabetu gara biltzen den hondakinaren kalitatea nabarmen hobea, garbiagoa eta, horrenbestez, aprobetxagarriagoa dela. Hain zuzen ere, horixe bera da hondakin organikoen kanpainaren helburua”, azaldu du César Fernández de Landak, Landa Plangintza eta Ingurumen Kudeaketako zinegotziak.

Auzoen ondoren, hirigune historikoaren unea iritsiko da hirian gaikako bilketan egindako hobekuntzei bukaera bikaina emateko. Bilketa pneumatikoko sistema ere baduen auzo horretan beste era batera jardungo dute; hala, bilketa pneumatikoa errefuserako eta ontzietarako utziko dute eta, aldiz, hondakin organikoak edukiontzi bidez jasoko dituzte, ondorioztatu dute azkenik Gasteizko Udaletik gaur.