Euskal Autonomia Erkidegoko merkataritza-gune handietako eta elikadura-kateetako salmentek ia puntu bateko jaitsiera izan zuten urrian, iazko urteko epe garaiarekin alderatuta, Eustat Euskal Estatistika Erakundeak berriki egindako txosten baten arabera.
Hala, Eustaten datuen arabera, Euskal AEko merkataritza-gune handietako eta elikadura- kate handietako salmentek % 0,8 egin dute behera 2022ko urrian, aurreko urteko hil beraren aldean, prezio konstanteetan eta lan-egutegiko baldintza homogeneoetan. Aurreko hilaren aldean, urtaro-ondorioak kenduta, prezio konstanteetako salmentak % 0,4 igo dira urrian. Ildo beretik jarraituz, 2022ko irailaren aldean, elikagaien sektorean % 1,0 igo dira prezio konstanteetako salmentak; gainerako produktuen sektorean, berriz, % 0,8 jaitsi dira hil artean salmentak. “Urte arteko terminoetan, 2022ko urrian 2021eko urriaren aldean, bilakaera negatiboa izan da elikaduran, % 2,1 jaitsi baitira prezio konstanteetako salmentak. Gainerako produktuetan, ordea, salmentak aurreko urteko urrian baino % 2,0 handiagoak izan dira”, azpimarratu zuten txostenean.
Lurraldeka
Lurraldeei dagokienez, saltoki handien salmentetan aldeak izan dira Araban, Bizkaian eta Gipuzkoan baino. Hori bai, nabarmentzekoa da jaitsiera bi lurraldetan bakarrik gertatu dela. Arabari dagokionez, ehuneko-puntu bat jaitsi da urtetik urtera; Gipuzkoan, % 4,1 gutxiago; eta Bizkaian, % 0,2 igo da, ordea.
Iraileko salmentek behera egin dute Araban eta Bizkaian (bi lurraldeetan puntu erdi portzentual), eta Gipuzkoan, berriz, %2,5 igo zen. “2022ko irailarekin alderatuta, salmentek % 0,5 egin dute behera Araban eta Bizkaian, eta Gipuzkoan, berriz, % 2,5 egin dute gora. Euskal AEko azalera handietako eta elikadura-kate handietako langile enplegatuen kopurua % 4,7 igo da 2021eko urriaren aldean. Hil artean, langileen indizea % 0,8 igo da”, zehaztu zuten.
Bestalde, urte honetako lehen hamar hilabeteetan, Merkataritza-azalera handietako eta elikadura-kate handietako salmenta-indizearen beherakada % 1,2koa izan da. Jaitsiera hori elikagaietako salmenta metatuen % 4,7ko jaitsierak eragin du; izan ere, urrira arte metatutako salmentak % 6,0 igo dira gainerako produktuetan. Urtean zehar metatutako aldakuntza negatiboa da Araban eta Gipuzkoan, % 3,0ko eta % 2,7ko jaitsiera metatuekin, hurrenez hurren. Bizkaian, aldiz, salmenta metatuak % 0,1 igo dira. Sektoreko landunen indizeak % 2,3ko hazkunde metatua izan du urteko lehenengo hamar hilabeteetan.
