Osakidetzak aste honetan bertan kontratatuko du Irungo Lehen Mailako Arretarako espazio berriaren obra proiektua

Osakidetzak aste honetan bertan esleituko du Irungo pediatriako zentro berriaren proiektua idazteko eta obra zuzentzeko espedientea. Hori funtsezko urratsa da Bidasoa ESIren 2025-2035 Plan Zuzentzailearen barruan, eskualde osoko osasun-arreta eraldatu eta hobetu nahi baitu, lehen mailako arreta zein ospitalekoa. Osakidetzak gune hori egokitzeko egingo duen inbertsioa milioi bat euro ingurukoa izango da. Obrak datorren urtean hasiko dira, eta gutxi gorabehera 7 hilabete iraungo dute. 

Irungo pediatria-zentro berriak honako hauek izango ditu:

• Administrazio-eremua, onarpen-eremuarekin.
• Pediatriako eremua, 6 kontsulta mediko eta erizaintza pediatrikoko 6 kontsultarekin, larrialdietako/proba funtzionaletarako gela, itxarongela eta edoskitze-espazioa.
• Langileen eremua: aldagelak, egongela, biltegia eta garbiketa-gela.

Osakidetzak datozen urteetan bi osasun-azpiegitura berri eraikitzea aurreikusi du. Eraikin berriak martxan jartzeko zain, lehentasunezkotzat jotzen du orain pediatriako eremua lokal berri honetara eramatea, gaur egun espazioak mugatuak baitira eta pediatriako asistentzia-guneen baldintzak hobetu behar baitira. Horrela, zentroan libre dauden espazioei esker, kontsultak eta itxaroteko eremuak birkokatu ahal izango dira, orain kanpoko modulu prefabrikatuetan daudenak.

Hori dela eta, Osakidetzak formalki eskatu du jada Irungo Alardearen sektorea aldi baterako lagatzeko prozedura has dadin, funtsezkoa baita pediatriaren arloa behin-behinean lekualdatzeko. Udalak lokalaren aldi baterako lagapena izapidetzen hasteko erabakia onartzen duenean, horren berri emango zaio Eusko Jaurlaritzako Ondare eta Kontratazio Zuzendaritzari, lagapen-espediente ofizialari hasiera eman diezaion.

23 milioiko inbertsioa Lehen Mailako Arretan

Bidasoa ESIren 2025-2035 Plan Zuzentzaileak Lehen Mailako Arretako unitateak berritzea eta handitzea nabarmentzen du, bereziki Irunen, non espazio zabalagoak eta funtzionalagoak sortuko diren. Gaur egun, Irunen bi osasun-zentro daude, 70,000 pertsona inguru artatzen dituztenak. Bi eraikinak 1954an eta 1994an eraiki ziren, hurrenez hurren, eta egungo eskakizunetara eta beharretara egokitu behar dira. Hori dela eta, bi zentro berri eraikiko dira: bata Irungo erdigunean, egungoa ordezkatuko duena, eta bestea Oinaurre auzoan.

Osasun Sailak 23 milioi eurotik gorako inbertsioa egingo du Irungo Lehen Mailako Arretarako, bi zentro berriak barne. Eusko Jaurlaritzako Osasun Sailaren eta Osakidetzaren beste urrats bat, Bidasoako eskualdeko osasun-sistema indartzeko konpromisoa betez, kalitatezko arreta bermatzeko eta herritarren egungo beharretara egokitzeko.