Osakidetzak osasun mentaleko 120.000 paziente artatu zituen 2024an

Osakidetzak osasun mentaleko 120.000 paziente artatu ditu 2024. urtean, eta, 100.000 biztanleko 15 psikiatrako ratioarekin, Euskal Autonomia Erkidegoa (EAE) da arreta psikiatriko gehien ematen duen Espainiako Estatuan.

Hala jakinarazi dute Osakidetzak eta Eusko Jaurlaritzako Osasun Sailak, Osasun Mentalaren Nazioarteko Egunean. Bi erakundeek osasun mentalaren arreta integralarekin eta Euskadiko Osasun Itunean jorratutako ildo estrategikoarekin duten konpromisoa berretsi dute.

Ildo horretan, Osaun Itunaren mahaia osatzen duen taldeak Osasun Sailari eskatu zion proposamen zehatz bat aurkez zezala urtea amaitu aurretik, osasun mentaleko ekintzak indartzeko eta zabaltzeko.

Horretarako, diziplina anitzeko lantalde bat eratu da, psikiatrek, psikologoek, haur psikiatrek, erizainek eta pazienteek osatua, besteak beste; Estatuko erreferentziazko adituek ere parte hartzen dute.

EKIMENAK

Taldeak ekimenak aztertzen eta esperientziak partekatzen ditu, eta tresna eta soluzioak diseinatzea du helburu, pazienteei zein haien familiei osasun mentalaren arloko arreta eta errekuperazio prozesuan laguntzeko.

Gaur egun, Osakidetzaren Osasun Mentaleko Sareak 1.600 profesional inguru ditu -psikiatriako bost espezialistatik bat-, eta asistentzia baliabide ugari ditu: 450 ohe dituzten lau ospitale psikiatriko, eguneko 23 ospitale, helduen, haurren eta adikzioen osasun mentaleko 50 zentro, tratamendu asertibo komunitarioko taldeak, lehen gertakarietakoak eta lurralde osoan dauden hezkuntza unitate terapeutikoak.

Horrela, 2024. urtean, baliabide horiek guztiek 120.000 paziente ezberdin artatu zituzten, eta 30.000 lehen kontsulta eta 500.000 jarraipen kontsulta egin zituzten.