Lanbide Heziketako itunpeko ikastetxeen modernizazio teknologikoa sustatzeko 1,7 milioi euro erabiliko ditu Jaurlaritzak

Lanbide Heziketako zikloak ematen dituzten itunpeko ikastetxe pribatuei zuzendutako makina eta ekipamendu teknololgikoak erosteko edo alokatzeko diru laguntzen deialdia onartu du astearte honetan Eusko Jaurlaritzako gobernu kontseiluak, Begoña Pedrosa Hezkuntza sailburuaren proposamenez, 1.728.917 euroko aurrekontuarekin.

Lanbide Heziketa moderno, berritzaile eta euskal produkzio sarearen egungo eta etorkizuneko beharrekin lerrokatua indartzen jarraitzea da helburua, zentroen eguneratze teknologikoa eta transformazio digitalari eta jasangarritasunari lotutako proiektu aurreratuen ezarpena erraztuz, Jaurlaritzak jakinarazi duenez.

Deialdia bi jarduera ildo osagarritan egituratu da. Lehenengoa 779.674 eurokoa da, eta Lanbide Heziketako ikastetxe itunduetan prestakuntza zikloak emateko behar diren makinak eta ekipamendua eguneratzera bideratuta dago. Ildo horrek indartu egiten du ikastetxeen konpromisoa, baliabide teknikoak berrituz eta ikaskuntza espazioak metodologia berritzaileagoetara, kolaboratiboetara eta sektore profesionalen errealitatearekin lotuagoetara egokituz lagunduz.

Bigarren lerroa, 949.243 eurokoa, 4.0 eta 5.0 inguruneen erronkei erantzungo dieten eta Lanbide Heziketaren eraldaketa digitalean eta jasangarritasunean aurrera egiten lagunduko duten proiektuak garatzera bideratuta dago.

Proiektuek teknologia aurreratuak txertatu ahal izango dituzte, hala nola adimen artifiziala, elkarlaneko robotika, 5G sareak, zibersegurtasuna, internet industriala, errealitate birtuala eta areagotua edo biki digitalak, enpresek eskatutako ekoizpen prozesuak eta profil profesionalak eraldatzen ari diren beste tresna batzuen artean.

Deialdia euskal Lanbide Heziketaren eraldaketa prozesuaren barruan dago eta bat egiten du Euskadiko Lanbide Heziketako 2030 Estrategian lehenetsitako helburuekin. Estrategia horrek gaitasun teknologikoak, berrikuntza aplikatua, jasangarritasuna eta giza garapena indartzearen alde egiten du.

Ekimenaren bidez, Hezkuntza Sailak Lanbide Heziketa aldaketa teknologikoetara eta enpresen beharretara etengabe egokitzea sustatzen jarraitzen du, eta, hala, ikasleak ekipamendu eguneratuekin eta ikasteko ingurune aurreratuetan trebatu ahal izatea errazten, haien kualifikazioa, enplegagarritasuna eta etorkizuneko erronkei aurre egiteko gaitasuna bultzatuz.