Donostiako Udalak Altza eta Amara Berri auzoetako bizilagunen bizi kalitatea hobetzeko proiektu bana esleitzea onetsi du astearte honetan, eta, horri esker, urte hasieran hasiko dira gauzatzen. Zehazki, Altzako anbulatorioan igogailu bat eraikitzeko eta Olaeta eta Armeria plazak berrurbanizatzeko proiektua idazteko esleipenak onartu ditu.
Jon Insausti alkateak prentsaurrekoan adierazi duenez, "beste behin ere, hiriko gobernuak donostiarren beharretan jarri du arreta. Gaur onartu dugun izapide honekin, Altza auzoko irisgarritasuna hobetuko duen igogailu bat eraikitzen hasiko gara, anbulatorioa bezalako eremu garrantzitsu batean pertsonen mugikortasuna erraztuz".
"Eta, gainera, Amara Berrin entzute prozesu berri bat jarriko dugu abian, bertako bizilagunek auzoko funtsezko eremu batean dituzten behar konkretuak zehaztu ahal izan ditzaten, behin betiko proiektu batean islatzeko", gaineratu du.
Horrela, alde batetik, Excavaciones y Transportes Orsa S.L. enpresari esleitu zaio Altzako anbulatorioko irisgarritasuna hobetzeko obren kontratua, sei hilabeteko egikaritze epearekin eta 606.323 euroko aurrekontuarekin.
Proiektuak osasun zentroaren irisgarritasun unibertsala bermatu nahi du, aparkalekua bertako sarbide nagusiarekin lotuz. Horretarako, hiru solairuko igogailua eta bi lotura-pasabide sortuko ditu, kanpoko aparkaleku publikoaren eremua eremuko bi interesgunerekin lotzeko: topoaren sarrerako ahoa eta Altzako anbulatorioaren sarrera.
Horrela, sistema ingurunean dauden oinezkoentzako joan-etorri eta ibilbideetan integratuko da, eta ibilbide irisgarri berriak eskainiko ditu, ez soilik ekipamendu sanitarioarentzat, baita auzoko bizilagunentzat ere.
Bestalde, Leku Studio S.L.P. enpresari esleitu zaio Olaeta eta Armeria plazen berrurbanizazioa burutzeko proiektua idazteko kontratua, bederatzi hilabeteko epearekin eta 74.901 euroko aurrekontuarekin. Kontratuak jasotzen du Olaeta eta Armeria plazen berrurbanizazioa gauzatzeko proiektuaren idazketa, bai eta idatzi aurretik herritarren partaidetzazko prozesuarekin zerikusia duten zeregin eta baldintzak ere.
Jarduera hau, gainera, Aktibazio eta Hobekuntza Planaren (PAM! Amara Berri) auzoko parte hartze prozesu zabal baten bidez diseinatu zen espazio publikotik.
