Eusko Jaurlaritzako gobernu kontseiluak datozen egunetan Gauzatu Industria programa aktibatzeko tramiteak abiatzea onartu du, 28 milioi euroko zuzkidurarekin. Programa horren bidez, oinarri teknologikoko ETEek edo berritzaileak direnek aurrerakin itzulgarriak lortu ahal izango dituzte, dela sortzeko, dela garatzeko.
SPRI Enpresa Garapenerako Euskal Agentziak kudeatzen duen Industria, Trantsizio Energetiko eta Jasangarritasun Sailaren programaak aurretiko eskaera egiteko aukera ematen du urtarriletik, eta bere helburu nagusietako bat enplegua sortzea da.
Gauzatu Industria 2025eko Industriarentzako Laguntza Planaren barruan dago; planak 500 milioi eurorainoko zuzkidura du, industria gehiago, industria hobea eta emisio gutxiago lortzeko helburu hirukoitza bultzatzeko.
Programan sar daitezke erauzketako, eraldaketako, produkzioko eta produktu prozesu industrialari lotutako zerbitzuetako ETE industrialak, baldin eta oinarri teknologikokotzat edo berritzailekotzat jotzen badira, baita jarduera nagusia IT/OT (Information Technology/Operational Technology) inguruneetarako zibererasoetatik babesteko sistemak industria enpresetan bateratzea eta integratzea duten enpresak ere.
Itzulgarri beharreko laguntzak emango dira, inbertsioaren %35erainokoak, gehienez 200.000 eurokoak sortutako enplegu bakoitzeko edo 150.000 eurokoak hasierako plantilla mantentzeko. Laguntzak bost urtetan itzuli beharko dira, eta ezingo dira 1.500.000 eurotik gorakoak izan enpresa bakoitzeko.
Eusko Jaurlaritzak 140 milioi inbertitu ditu Gauzatu Industria programan azken bost urteetan, eta horrek 642 milioi euroko inbertsioak egitea eta 3.632 enplegu sortzea edo mantentzea ekarri du. Iaz laguntzara bideratutako 28 milioi euroek 162,5 milioi euroko inbertsio enpresariala eta 870 lanpostu sortu zituzten.
'Gauzatu Industria' programara bideratutako 677 milioi euroek lortu dute oinarri teknologikoa edo berritzailea duten ETEek 2.887 milioi euro inbertitzea eta 18.565 lanpostu sortzea edo mantentzea 2000tik 2024ra.
