EHUk 9.000tik gora lagun bildu ditu Bilbon eta Portugaleten Europako Ikertzaileen Gauean

Euskal Herriko Unibertsitateak (EHU) Europako Ikertzaileen Gaua ospatu zuen joan den irailaren 27an, bere ikertzaileen lana eta horrek gizarteari ekartzen dizkion onurak herritarrei ezagutarazi eta bokazio zientifikoa sustatzeko, berdintasun baldintzetan, eta 9.000 pertsona baino gehiago bildu zituen Bilbon eta Portugaleten (Bizkaia) antolatutako ekintzetan.

Horrela, EHUko iturriek jakinarazi dutenez, bosgarren urtez ospatu zen Europako ekitaldia Bilbon. Herritarren parte hartzea handia izan zen, 7.150 pertsona hurbildu baitziren Areatzako pasealekuan jarritako 31 txoko zientifikoetara.

EHUko 170 adituk euren ikerketen emaitzak partekatu zituzten bertaratu zirenekin. Gizartearentzat garrantzitsuak diren arazoei irtenbideak bilatzeari lotutako proiektuak aurkeztu ziren, hala nola minbiziari, klima aldaketara egokitzeari, hiri adimentsu eta klimatikoki neutroei, edo lurzoruaren eta elikagaien osasunari lotutakoak.

Gainera, gazteek EHUko emakumezko ikertzaile batzuen ekarpenak bertatik bertara ezagutu ahal izan zituzten, genero oztoporik gabeko bokazio zientifikoa sustatzeko helburuarekin.

Portugaleten, aldiz, lehen aldiz ospatu zen Europako Ikertzaileen Gaua. Familiei zuzendutako ekimen zientifikoak Euskadin itsas energia berriztagarriek eta itsas zientziek klima aldaketaren aurkako borrokan duten potentziala erakustea izan zuen ardatz, modu ludiko eta entretenigarrian, eta 2.000 pertsona baino gehiago bildu ziren Bilboko Ingeniaritza Eskolak Portugaleten duen eraikinean.

Tecnaliak gidatzen eta EHUren, Euskampus Fundazioaren eta BCAM Basque Center for Applied Mathematics erakundearen lankidetza duen ekimenean, erakusketak, joko didaktikoak, aerosorgailuen maketen eraikuntza, itsaspeko roboten lehiaketa, droneen hegaldiak eta adin guztietarako laborategiko esperimentuak egon ziren.