stean behin liburutegira joaten gara alabekin. Oso txikiak direnetik familia plan gogokoenetako bat da. Bai neguan, bai udan. Ez bakarrik eskura ditugun liburuen kopuruagatik, baizik eta han, neskek ikasi dutelako zein zoragarria den liburu bat etxera eraman, irakurri eta zaindu ahal izatea zurea balitz bezala, eta gero itzultzea, beste batzuek gozatu ahal izan dezaten. Gainera, han orduak oso azkar pasatzen dira. Izan ere, apaletan bilatzea, ipuinak arretaz begiratzea edo liburuzainen gomendioak entzutea asko gustatzen zaie. Horregatik guztiagatik, gaur, Liburutegi Egunean, gure hiriko liburutegiek egiten duten lana nabarmendu nahiko nuke. Azken hamarkadetan, zentro horiek aldaketa handia izan dute, liburu-edukiontzi izatetik topaleku izatera igaroz, hau da, toki bizi bat nondik adin guztietarako jarduera ugariren bidez irakurtzera animatzen den. Bai Ignacio Aldecoa Kultura Etxeak bai Udalaren Liburutegi Sareak egitarau erakargarria eskaintzen dute. Horien artean, Ane Gebararen istorioak izugarri gustuko ditugu, edo bereziki gogoratzen dugu Mikel Valverdek emandako ilustrazio tailerra, eta Florida parkeko espezie ezberdinak ezagutzeko egindako ibilaldia. Ez ahaztu hurrengo asteetako egitarauari begiratu bat egitea, ez zarete damutuko. Liburutegiak zuen zain daude.
