Gasteizko Udalak 70.000 euro bideratuko ditu herrietako ekipamenduak eta espazio publikoak hobetzera

Gasteizko Udalak diru laguntzen deialdi publiko bat onartu du ostiral honetako gobernu bileran, udalerriko toki erakunde txikien titulartasuneko ekipamendu eta espazio publikoetako obrak finantzatzeko. Lerroak 70.000 euroko zenbatekoa izango du, eta 2026an egingo diren jarduerei laguntzea ahalbidetuko du.

Gasteizko Udaletik jakinarazi dutenez, deialdiaren helburua kontzejuei beren eraikinak eta oinarrizko azpiegiturak hobetzen laguntzea da, ekipamendu publikoak egoera onean mantentzen eta irisgarritasun eta funtzionaltasun irizpideetara egokitzen lagunduko duten jarduerak erraztuz.

Miren Fernandez de Landa, Landa Eremuaren zinegotziaren hitzetan, "Gasteizi buruz hitz egiten dugunean, gure udalerriaren funtsezko parte diren 63 herriez ere hizketan ari gara, eta baldintza onak dituzten zerbitzu eta instalazioak izatea merezi dute".

Ildo beretik, gaineratu duenez, "Landa Eremuaren Zerbitzutik administrazio batzarren ondoan egon nahi dugu, kontzeju etxeetan, gizarte etxeetan edo espazio komunetan beharrezko hobekuntzak egin ahal izan ditzaten, komunitate bizitzarako leku irisgarriak, erosoak eta erabilgarriak izango direla bermatuz".

Diruz lagun daitezkeen jardueren artean daude: batzar etxeak eraberritzea, gizarte zentroak egokitzea, berokuntza instalatzea, estalkiak birgaitzea, irisgarritasuna hobetzea, haurrentzako jolasen eremuetan esku hartzea, zolatze lana egitea eta lorategiak, bideak eta beste espazio publiko batzuk edertzea eta mantentzea.

Laguntzek justifikatutako gastuaren %80raino estali ahal izango dute, eta modu proportzionalean banatuko dira onartutako eskaeren artean. Eskaerak aurkezteko epea 30 egun naturalekoa izango da, deialdia Arabako Lurralde Historikoaren Aldizkari Ofizialean argitaratzen denetik.