Gasteizko Udalak infografien bideo bat egin du auzotarrek ikus dezaten Zaramaga nola geratuko den obren ondoren

Beatriz Artolazabal Espazio Publikoaren eta Auzoen zinegotziak infografiak biltzen dituen bideo bat aurkeztu du Auzoan egiten ari diren sei esku hartze handien ondoren Zaramagako kaleak nola geratuko diren erakusten duten infografiak dira, eta Zaramagako Bizan zentroan eta Iparralde gizarte etxean ere proiektatuko dira, abian den erakusketa osatzeko, auzokideek ingurunea nola aldatuko den lasai ikusteko aukera izan dezaten.

Gasteizko Udalaren arabera, hamarkada askoan bere espazio publikoak izandako eraldaketa handienetako bat bizi du Zaramaga auzoak. Sei proiektu daude martxan eta horien guztizko balioa 9 milioi euro ingurukoa da.

Obra luze eta konplexuak dira, ezinbestean eragozpenak sortzen dituztenak, baina "aurreikusitakoaren arabera aurrera egiten ari dira, eta auzoan bizi direnen irisgarritasuna, hiri kalitatea eta erosotasuna hobetzea ahalbidetuko dute", Artolazabalek ziurtatu duenez.

Esku hartzea Eusko Jaurlaritzaren Etxebizitza eta Hiri Agenda Sailak onartutako auzoak berroneratzeko Inbertsio Estrategikoen Planean jasotako jarduketen barruan dago, eta Gasteizko Udal Gobernuak Zaramaga auzoaren hiri, gizarte eta ingurumen berroneratzean jarduteko duen konpromiso estrategikoetako bati erantzuten dio.

LANKIDETZA

Erakundeen arteko lankidetzaren barruan, Eusko Jaurlaritzak 5.389.124,50 euro jarri ditu Zaramagako berrurbanizazio lanetarako. "Finantzaketa oso garrantzitsua da. Sei proiektu handiak aurrera eramaten laguntzen du. Eta auzoaren eraldaketa integrala indartzen du", esan du Artolazabalek.

Zinegotziak aitortu duenez, "badakigu obrekin bizitzea ez dela erraza. Horregatik, pauso bat gehiago eman nahi izan dugu komunikatzeko eta norantz goazen erakusteko. Bideo honek eraikitzen ari garen Zaramaga irudikatzen laguntzen du: kale erosoagoak, berdeagoak eta pertsonentzat pentsatuagoak".

Jarduketa guztiek egutegi desberdinak dituzte, baina udaberri eta uda bitartean amaitzea aurreikusita dago. "Epe horiek betetzea espero dugu, nahiz eta tamaina horretako obretan beti sor daitezkeen egutegiak aldatu behar izatea eragiten duten ezustekoak. Gure konpromisoa da obra bakoitzaren gainean egotea, arazoei aurrea hartzea eta gardentasunez azaltzea", esan du.