Artium Museoak AMA ikasketa zentroa sortu du arte garaikideari buruz modu kritikoan pentsatzeko

Gasteizko Artium Euskal Herriko Arte Garaikidearen Museoak AMA ikasketa zentroa jarri du martxan, arte garaikideari eta haren ahalmenei eta hedapenari buruz modu kritikoan eta testuinguruan kokatuan pentsatzeko, ikertzeko eta hausnartzeko espazio berria. Zentroak etengabe garatzen ari den lan esparru bat aktibatzeko aukera emango du, eta oso kontuan izango ditu artearen testuinguruak zeharkatzen dituzten galderak.

Museoko iturriek jakinarazi dutenez, AMA ikasketa zentroa ostegunan zabalduko da, urtarrilaren 29an, 'Honako lur hura habitatzeko moduak' izeneko bi eguneko programarekin. Marwa Arsanios artistaren 'Lurrak ez du jaberik izango' erakusketa izango du abiapuntu, eta banaketa, jabetze eta erauzte politikei buruzko pentsamendu eta hausnarketa gune bat irekitzea helburu.

Bertan izango dira, besteak beste, Marwa Arsanios bera, Nader Koochaki eta Kimia Kamvari artistak, Madrilen egoitza duen Paisanaje kolektiboa, Leire Vergara komisarioa eta Françoise Verges arrazakeriaren eta kolonialismoaren aurkako ekintzaile feminista.

Programa publiko honetako jarduera guztiak edonorentzako irekiak dira, edukiera mugatuarekin, Paisanaje kolektiboaren lantegia izan ezik, aldez aurretik izena eman behar baita ikasketazentroa@artium.eus helbide elektronikora gehienez ere 200 hitzeko motibazio gutun bat bidaliz.

AMA ikasketa zentroaren bigarren proposamenak 1976ko martxoaren 3an Gasteizen izandako gertakariak berreskuratzea proposatuko du otsailean, 50. urteurrena betetzen denean, memoriaren formei buruzko hausnarketa kolektiborako espazio bat errazteko. Memoria hori, arlo materialean -objektuak, artxiboak, euskarriak- nahiz immaterialean -hainbat belaunaldiren oroimenean bizirik dirauten gertakari haiei lotutako oroitzapenak- adieraziko da.

Memoriaren taupadak: memoriaren euskarriakotsailaren 26tik 28ra bitartean egingo da, eta memoria hori gaur egun nola berpizten den aztertuko da bertan, 1976ko gertakariak kolektibo batzuen eta besteen ikuspegiekin elkarrizketan jarriz.

Azkenik, AMA ikasketa zentroaren programa publikoak elkarrizketa bat bilatuko du martxoan 'Zirkulu batetik begira begiraden zirkulu batean' erakusketa kolektiboarekin. Urtarrilaren 16an inauguratu zen, eta lotutako programa publikoan parte hartuko dute, besteak beste, Ana Pi koreografo brasildarrak eta Louidgi Beltrame artista frantsesak. Programa martxoaren 12tik 14ra garatuko da.