Gasteizko Udaltzaingoak patinete elektrikoak kontrolatzeko hiru asteko kanpaina hasiko du astelehen honetan

Gasteizko Udaltzaingoak mugikortasun pertsonaleko ibilgailuak kontrolatzeko kanpaina espezifikoa egingo du lehen aldiz astelehen honetatik, urtarrilaren 26tik, eta hiru aste iraungo du, otsailaren 15era arte.

Orain arte, kanpaina mota horrek patinete elektrikoak eta bizikletak barne hartzen zituen. Oraingoan, berriz, mugikortasun pertsonaleko ibilgailuen gidari guztietan jarriko da arreta, batez ere gazteetan eta tarteko adinean dauden pertsonetan, kontrol espezifikoekin.

Zaintzak hiri osoa hartuko du, eta lehentasun berezia emango zaie pertsonen joan-etorri handieneko guneei eta normalean patinete elektrikoak ibiltzen diren tokiei. Patruilek kontrol estatikoak egingo dituzte jende asko biltzen den tokietan, zaintza dinamikoa gainerako eremuetan. Kontroletan ibilgailuen ezaugarri teknikoak eta nahitaezko asegurua izatea egiaztatuko dira.

Azken faktore hori berritasuna ere bada aurreko kontrol kanpainekin alderatuta, urtarrilaren 2an indarrean sartu zen 5/2025 legearen arabera, derrigorrezkoa baita asegurua izatea mugikortasun pertsonaleko ibilgailu arinen kasuan. Hala ere, betebehar hori aseguratutako ibilgailuak inskribatu beharko liratekeen erregistroa DGT erakundeak martxan jartzearen mende dago. Beraz, gaur egun asegurua ez edukitzea ez da zehagarria salbuespen batekin: 25 kg-tik gorako pisua eta 14 km/h-ko abiadura duten ibilgailuak.

ZEIN DA KANPAINA HONEN HELBURUA?

Udaltzaingoak asegurua izatea derrigorrezkoa dela gogorarazi eta aurreko kanpainetan gainbegiratutako beste alderdi batzuk kontrolatuko ditu, hala nola patinetea erabiltzeko gutxieneko adina (15 urte), baimendutako eremuetatik zirkulatzea, ikuspena eta argiak izatea, gehieneko abiadura errespetatzea (25 km/h), aurikularrak edo telefono mugikorra erabiltzeko debekua edo kaskoa nahitaez erabili beharra.

"Astelehen honetatik aurrera patinete elektrikoetan jarriko dugu arreta, ibilgailu horien erabilerari lotutako istripuak murriztu nahi ditugulako, eta MPIen eta bide publikoaren gainerako erabileren arteko bizikidetza hobetu nahi dugulako. Gainera, gogorarazi nahi dugu epe laburrera begira derrigorrezko asegurua ez izatea zehagarria izango dela, eta patinete elektrikoa erabiltzen dutenek berritasun hori ezagutu behar dutela", adierazi du Segurtasuneko zinegotzi Cesar Fernandez de Landak.