Gasteizko Gazte Klik Klak lehiaketako irabazleen erakusketa ostiralean inauguratuko da

Gasteizko Udalaren Gazte Klik Klak argazki eta ikus-entzunezko ekoizpeneko lehiaketaren hamabosgarren edizioko lan irabazleak eta aukeratuak biltzen dituen erakusketa inauguratuko da ostiralean, urtarrilaren 16an. Lehiaketara aurkeztutako 19 lanen artean, epaimahaiak hamar aukeratu zituen, eta otsailaren 13ra arte egongo dira ikusgai LABE Gazte Laborategian.

Gasteizko Udaletik jakinarazi dutenez, hiriko 14-25 urteko gazteei zuzendutako ekimenaren edizio berriak zaporeak izan ditu ardatz, "zentzumenak pizteko eta arimarekin dastatzen denari eta irudietan proiektatzen denari buruz hitz egiteko proposamenak bilatzeko".

Lehiaketa Gasteizko Udaleko Kultura eta Gazteria zerbitzuek antolatu dute, Sortzen gazte sorkuntzako programaren barruan. Gainera, Laboral Kutxaren laguntza izan du.

Erakusketan ikusgai daude Sua Cangaren 'Los sabores de mi casa', Nora Lafuenteren 'El sabor de lo efímero', Louisette Cristine Plazaolaren 'Sabores de la infancia' eta Jone Carbajosaren 'Gazte zaporeak' argazki serie irabazleak.

Gainera, hautatutako lanekin osatutako collagea ere egongo da ikusgai: Sua Canga, Nahia Egaña, Nahia Guillén, Jare Morffe eta Azahara Sanchezen 'Esto sabe a tiempo', 'Mandarina', 'En el cielo y en la tierra', 'Amor de carne viva' eta 'Sabores reales e irreales', hurrenez hurren, eta Lucas Palacios, Ander Villareal eta Tasio Olloquiren 'Zapore abandonatuak' ikus-entzunezkoa.

Ostiraleko inaugurazio ekitaldian Laboral Kutxa saria ere banatuko da: 400 euroko txartela obra irabazle bakoitzeko, argazki eta ikus-entzunezko materialarekin trukatzeko. Gainera, ostiraletik aurrera, erakusketa sarean ikusi ahal izango da Gazte Klik Klak-en argazki galerian eta Youtubeko erreprodukzio zerrendan.