Gasteizko Udaleko Kirol Zerbitzuak inkesta bat jarri du martxan udal instalazioetan abonatuta dauden 93.000tik gora pertsonen artean, jakiteko zergatik dauden abonatuta, zer erabilera ematen dieten zerbitzuko instalazioei eta zenbateraino dauden pozik. Hobetzen jarraitzea eta abonatuen erabilera beharretara egokitzea da inkestaren xedea.
Gasteizko Udaletik jakinarazi dutenez, inkesta egiteko formularioa https://www.vitoria-gasteiz.org/j31-01w/formularioViewer/cre... estekan dago, eta betetzeko ez dira behar lau minutu baino gehiago.
Inkestan parte hartzen dutenek Kosner Baskoniaren eta Alavesen partidetan "VIP esperientzia bikoitz bat" izateko zozketan parte hartuko dute. Inkesta betetzeko azken eguna abenduaren 17a da, eta zozketa hurrengo egunean egingo da.
Inkesta betetzeko beharrezkoa da 18 urtetik gora izatea, udal kirol instalazioetan abonatuta egotea eta Kirol Zerbitzuak hilero egiten duen buletin digitalera harpidetuta egotea. Zozketaren emaitzak udal web orriko Kirol Zerbitzuaren gunean argitaratuko dira.
GASTEIZKO UDALA
Bestalde, Gasteizko Udalaren beste albiste batzuekin jarraituz, BIZANen Neguko Kontzertua egingo da abenduaren 15ean, Europa Jauregian. Iazko arrakastaren ondoren, jarduera errepikatzea erabaki da, oraingoan big band eta abesbatzen musikarekin. Sarrerak 2 euroko prezio sinbolikoan daude eskuragarri gaurtik hilaren 14ra bitartean BIZAN zentro guztietan. “Gure helburua sarea ezagutaraztea eta Gabonen inguruko egunetan musikaren eta bidezko merkataritzaren inguruko topaketarako eta dibertsiorako gunea sortzea da”, azaldu du Lucho Royero Gizarte Politiken zinegotziak.
BIZANek antolatutako programak bi zati ditu. Lehenengoan, 18:30 eta 19:30 bitartean, Big Band Berri taldeak kontzertua eskainiko du Maria de Maeztu auditorioan. Gasteizko taldea Luis Aramburu Udal Musika Eskolako hogei bat musikarik eta abeslarik osatzen dute. Bi hamarkada baino gehiagoko ibilbidearekin, taldeak jazzeko eta blueseko kantu bikainez betetako errepertorioa eskainiko du, big banda handien swing nahastezinarekin interpretatuta.
