Gasteizko Udalak lursail bat egokituko du Salburuan 73 hiri baratze egiteko, bakoitza 50 metro koadrokoa, eta modu komunitarioan kudeatzeko. Elorriagako Atearen, Varsovia hiribidearen, Budapest hiribidearen eta Galileo kalearen artean dagoen lursaila da.
Hala iragarri dute asteazken honetan Beatriz Artolazabal Espazio Publikoaren eta Auzoen zinegotziak eta Xabier Ruiz de Larramendi EH Bilduko zinegotziak, ekimena udal gobernu taldearen eta EH Bilduren arteko aurrekontu akordioan jasota baitago, 300.000 euroko kostuarekin.
Ekimena gauzatzeko, 12.300 metro koadroko lursailetik 7.000 metro koadro egokituko dira, eta horrek aukera emango du etorkizunean handitzeko. Obrek sei hileko iraupena izango dute kontratua esleitzen denetik hasita, eta batez ere lursailaren malda gainditzea eta lursaila berdinduta terrazak sortzea izango dute helburu.
Hiri baratze berriak sortzearen helburua Salburuko hainbat eremutan eragitea da, baita autokontsumoa handitzea, biodibertsitatea hobetzea, bizilagunen ongizatea hobetzea eta auzoaren estetika bera hobetzea ere. Gainera, erabiltzaileen arteko sare soziala indartuko du praktika aktiboaren bidez.
Salburuko lursailak erabiltzaileen beharrei ere erantzungo die, ureztatzeko hiru uraska, kanpoko eta barruko biltegi bana eta komunak dituen etxola bat izango baititu. Barnealdean askaritarako gune bat ere prestatuko da, baratzeak erabiltzen dituzten pertsonen arteko harreman sareak bultzatzeko.
XEHETASUNEZ
Baratzeak martxan jartzearekin batera, Gasteizko Udalak informazio saioak, laguntza teknikoa eta esleipen sistema gardena eta txandakakoa jarriko ditu, gainerako hiri baratzeetan egiten duen bezala. Lursailen esleipena eta eskaera egutegia obrak amaitu ondoren iragarriko dira.
Horrela, Salburuko instalazio berria Gasteizko udal-baratzeen sarean sartuko da. Ingurumen Gaietarako Ikastegiak kudeatzen dituen Urarteko baratzeak (Abetxuku) eta Zabalortuko (Zabalgana), Lakuakoloreko (Lakua) eta Ortubiko (Borinbizkarra) baratzeak daude sarean, guztiak kudeaketa komunitariokoak.
