Tuvisa Gasteizko hiri autobusen zerbitzu publikoak bere historiako urririk onena izan du aurten, 1.857.115 bidaia zenbatetsi ondoren, hau da, aurreko urteko hilabete berean baino %4,47 gehiago. Aurtengo urrira arte inoiz ez da hilabete batean 1,8 milioi bidaiariren muga gainditu.

Urteko datu metatuari dagokionez, 15.886.641 bidaia egin dira dagoeneko, eta, horrela, 2024ko lehen hamar hilabeteekin alderatuta %9,12ko hazkundea izan da (1.327.250 bidaia gehiago), Gasteizko Udaletik jakinarazi dutenez.

BEI autobus elektriko adumendunak ia berdindu egin ditu erregistrorik onenak urrian. Hala, Betoñu-Goikolarra 3. lineak lehen aldiz hautsi du hileko 70.000 erabilerako langa; Lakua-Mariturri 4. linearen kasuan, 256.445 bidaia izan dira, bere markarik onena baino 10.000 gehiago, eta 5., 6. eta 10. lineek ere errekorrak hautsi dituzte aurreko hilabetean.

Erabilera tituluei eta bidaiarien profilari dagokienez, 30DJ abonamenduak 43.389 bidaia erregistratu ditu, hots, 2024ko urrian baino %12,16 gutxiago. Aitzitik, autobusak erabili dituzten 15 urtetik beherako 234.329 bidaiari izan dira, iaz baino %93,54 gehiago. Orobat, 28.824 erabilera zenbatu dira Bizkaiko Barik txartelarekin, eta 53.910 Gipuzkoako Mugi txartelarekin.

Bestalde, Gasteizko kontzejuetako eskariaren araberako garraioaren Bux zerbitzuak 1.569 erabilera izan ditu urrian, eta Gautxori gaueko lineek, berriz, 13.527 bidaia izan dituzte zerbitzua eskainitako bederatzi gauetan.

BESTE DATU BATZUK

Izaskun Reyes Tuvisako presidenteak adierazi duenez, "aurten, orain arte, 15,5 milioi bidaiako muga gainditu izana mugarri historikoa da Gasteizko mugikortasunerako. Garraio publikoarekiko konfiantzak gora egiten jarraitzen du, eta bereziki positiboa da gazteen eta 15 urtetik beherakoen kasua".

"Txikitatik ari gara mugikortasun arduratsuko ohiturak ereiten, eta etorkizunera begirako apustu horrek balio kalkulaezina du", gaineratu du.