Gasteizko Udalak Oronari esleitu dizkio Erdi Aroko hiriguneko eskailera mekanikoak berritzeko eta mantentzeko lanak

Gasteizko Udaleko gobernu batzordeak Orona enpresari esleitu dio Erdi Aroko hiriguneko eskailera mekanikoak berritzeko eta mantentzeko lanen kontratua. Helburua da herritarrentzako zerbitzu segurua eta iraunkorra bermatzea, egoera txarrean dauden elementuak ordezkatuz eta "orain arte eskainitakoa baino mantentze zorrotzagoa eginez".

Gasteizko Udalak uda honetan bertan jakinarazi duenez, inbertsioa 1,7 milioi eurokoa da, eta zenbateko horrek agerian uzten du "eremu historiko eta malda handiko horretan hiri mugikortasuna hobetzeko konpromisoa hartu duela bere gain".

Zenbateko horretatik 1,2 milioi euro elementu kritikoak prest jartzeko eta berritzeko erabiliko dira, eta gainerako 500.000 euroak mantentze lan integraleko zerbitzura bideratuko dira hiru urtez, beste bi urtez luzatzeko aukerarekin. Azken kontu sailak ekintza bandalikoen ondorioz egin beharreko konponketetarako ere balioko du.

"Erdi Aroko hiriguneko mugikortasun irisgarria lehentasuna da gobernu honentzat. Eskailera mekanikoek ezin dute hutsik egin, funtsezkoak baitira pertsona askoren eguneroko bizitzarako. Kontratu honen bidez, urrats sendoa eman dugu konponbide egonkor, moderno eta fidagarria lortzeko bidean", azaldu du Beatriz Artolazabal alkateorde eta Espazio Publikoaren eta Auzoen zinegotziak.

KONTRATUA

Kontratuak zortzi hilabeteko epea ezartzen du instalazioak modernizatzeko lanak egiteko, eta hondatutako piezak ordeztu, sistema teknikoak eguneratu eta gaur egun geldialdiak sortzen dituzten gabeziak zuzendu beharko ditu Oronak.

Gainera, kontratua sinatu eta hurrengo bi hilabeteetan, enpresa esleipendunak behin betiko mantentze plana aurkeztu beharko dio Gasteizko Udalari, baita planifikatutako zuzenketa lanen programa bat ere, eskaileretan eta igogailuetan egin beharreko lanetarako faseak zehaztasunez erregulatzeko.

Artolazabalek nabarmendu du esleipenak "ikuspegi aldaketa" ekarriko duela: "Gaur ez ezik, instalazioek hamar edo hamabost urte barru ere funtzionatzea nahi dugu. Kontratuak plangintza, kontrola eta eskakizun teknikoa biltzen ditu. Ez da nahikoa hondatzen dena konpontzea; aurrea hartu, prebenitu eta zorrotz mantendu egin behar da".