Gasteizko Udaleko gobernu bilerak Goikolarran lokal bat erosteko lehiaketaren hasiera onetsi du ostiral honetan, bertako auzo elkartearen egoitza izan dadin. Lizitazioa udal gobernuaren eta EH Bilduren arteko aurrekontu akordioaren parte da, eta gizarte etxe berria egokitzeko 150.000 euroko aurrekontu saila barne hartzen du.
Gasteizko Udalak jakinarazi duenez, auzo elkarteen egoitza izateko espazioak bideratzeko konpromisoa betetzen ari da aspalditik hiriko auzo guztietan. Jarduketa esparru horretan, orain arte, Goikolarrako bizilagunen elkartea higiezin txiki bat ari da partekatzen Gardelegiko Kontzejuarekin.
Hala ere, egoitzaren tamaina txikia eta erakundeen izaera kontuan hartuta, bi jarduerak bereiztea komeni da, eta, beraz, aurrekontu itunaren barruan auzotarren kolektiboari lokal propioa ematea erabaki zen.
Bada, udal gobernuak onartu duen prozeduraren helburua da beheko solairuan 170 eta 180 metro koadro arteko azalera eraikia duen lokala erostea.
Maider Etxebarria alkatearen ustez, "lizitazio horrek auzoetarako proiektu zehatz eta erabilgarrietan aurrera egitea ahalbidetuko du, eta hiriko elkarte sarearekin dugun konpromisoan emango dugun beste urrats bat da. Hori da defendatzen dugun hiri eredua: auzo erakundeek ahotsa eta aurrera egiteko behar diren bitartekoak dituzten hiri parte hartzailea".
Era berean, Rocio Vitero EH Bilduko bozeramaileak adierazi du Goikolarran bizi diren pertsonen auzo eskaerari erantzuteko sartu dutela aurrekontu saila. "Auzoak elkartzeko eta aisialdiko jarduerak gauzatzeko gune bat behar du. Hiriko auzorik gazteena da, auzo berria, eta horrelako oinarrizko ekipamenduak eman behar dizkiogu", gaineratu du.
