Ganbera Zikloaren XIX. edizioak Gasteizera lirikara eramandako euskal kantutegi herrikoia dakar

Apirilaren 18an, igandea, 12:00etan, Gasteizko Ganbera Zikloaren XIV. edizioaren hirugarren kontzertua izango da. Jesus Guridi Kontserbatorioko Areto Nagusian Helene García sopranoa eta Alaitz Artola piano-jotzailea izango dira, eta euskal abesti herrikoien aukeraketa bat taularatuko dute, estetika klasiko batetik, lirikatik, eta, horrela, beste dimentsio batez hornituz.

Horrela, Iparraguirre edo Iradierren kantuetatik hasi eta Xabier Lete, Benito Lertxundi edo Mikel Laboaren kantuetara ibilbidea egingo da. Abesti horiek, duten esanahiagatik eta integrazioagatik, euskal kultura-ondarearen parte dira.

Helene García soprano arabarrak Gasteizko Jesus Guridi Kontserbatorioan hasi zituen kantu ikasketak Miren Urbieta-Vegarekin. Urte horietan, Euskadiko Musikari Gazteen Lehiaketako lehen saria irabazi zuen, eta nazioarteko hainbat ziklotan parte hartu zuen, hala nola Musika-Musikan eta Donostiako Musika Hamabostaldian. Madrilen jarraitu zuen ikasten, Goi Mailako Kantu Eskolan, eta hainbat ekoizpenetan parte hartu zuen: Susana ‘Las Bodas de Fígaro’n (W. A. Mozart), Mamma ‘Madama Butterfly’n (G. Puccini) eta Susana ‘El secreto de Susana’n (Ermanno Wolf-Ferrai), besteak beste.

Azken urteotan bakarlari gisa jarraitu du Maciej Pikulskik Musikenen emandako Ahots Errepertorioan Sakontzeko Graduondokoan, eta koru zuzendaritzaren arloan ere trebatu da. Bakarlari gisa egindako ibilbidea abesbatzen zuzendaritzarekin eta Cantautores llevados a la lírica proiektuarekin uztartu zuen.

Amezketan jaio zen Alaitz Artola, eta han hasi zen pianoa jotzen Kontxu Altuna irakaslearekin. Donostiako Francisco Escudero Kontserbatorioan jarraitu zituen ikasketak. Denboraldi horretan, hainbat aldiz saritu zuten Donostia Hiria Nazioarteko Piano Lehiaketan. Halaber, Euskadiko Musikari Gazteen Lehiaketako lehen saria eta Parempuyren egindako Challenge Aliénor Nazioarteko Lehiaketako bigarren saria irabazi zituen.

Ondoren, Piano Interpretazioko ikasketak egin zituen Euskal Herriko Goi Mailako Musika Zentroan, Musikenen, Marta Zabaletaren eskutik, non ahots akonpainamenduan ere espezializatu baitzen Maciej Pikulskik eskainitako graduondoko batean. Gaur egun, Alaitzek Portugalen jarraitzen du ikasten, Portoko ESMAE zentroan. Bertan, Interpretazio Artistikoko masterra egiten ari da Miguel Borges Coelho irakaslearekin.