Gasteizko Udalak BIZAN Zaramagako erreforma integralerako lanak esleitu ditu, 1,2 milioi euroan

Gasteizko Udaleko gobernu bilerak BIZAN Zaramagako erreforma integralerako kontratua Iparragirre Eraikuntza Lanak S.L. enpresari esleitzea onartu du ostiral honetan. Aurrekontua 1.217.879,52 eurokoa da, eta gauzatzeko epea zortzi hilabete.

Gasteizko Udaletik jakinarazi dutenez, zentroko espazioak hobeto banatuko dira eta ekipamenduaren irudia modernizatuko da. Gainera, hobekuntza handiak egingo dira arretan, irisgarritasunean eta energia jasangarritasunean. Ekipamenduaren eraikitako azalera 891,23 metro koadrokoa da (709,92 metro koadro erabilgarri).

Eraikinak 50 urte ditu, 1970eko hamarkadaren amaieratik funtzionatzen du adinekoen zentro gisa, eta egunean 500 erabilera inguru izaten ditu. Ekipamenduaren eraberritzea Jaurlaritzaren eta Gasteizko Udalaren finantzaketarekin abiatutako Zaramaga Biziberritzeko Planaren ekimenen barruan dago. Erreforma amaitzean, Gizarte Politiken Udal Sailak zerbitzu berria altzariz hornitzeko eta abian jartzeko fasea iritsiko da.

Bizitegi Lehentasunezko Gunera sarbidea izateko gidalerroa

Bestalde, Vitoria-Gasteizko Udalak Bizitegi Lehentasunezko Gunera sarbidea izateko gidalerroak idazteko azken lanak egiten ari da. Dokumentu horrek garatuko du Emisio Txikiko Eremuko etorkizuneko ordenantza. Airearen kalitatea hobetzeko, isuri kutsakorrak gutxitzeko eta jasangarriagoa eta bizitzeko egokiagoa den udalerrirantz aurrera egiteko funtsezko proiektua da hori.

Beatriz Artolazabalek, Espazio Publikoaren zinegotziak, nabarmendu duenez, prozesu hau hasi zenetik, “lehentasuna eman zaio partaidetzari eta entzute aktiboari ETEa diseinatzeko garaian. Eta halaxe jarraituko dugu Bizitegi Lehentasuna duen Eremuarekin ere, gure proposamenak aztertzen eta ahalik eta adostasun handiena bilatzen”.

Lan koordinatu horrekin lotuta, Espazio Publikoaren Saila horren inguruan lanean ari diren kolektiboekin bildu da gaur (bizilagunen elkarteak, merkataritza eta ostalaritza) Bizitegi Lehentasunezko Gunearen funtzionamendua eta irizpideak zehaztuko dituzten gidalerroak finkatzeko. Kolektiboek, orain, testuarekin lotutako ekarpenak aurkezteko epea izango dute. Gero, horiek guztiak Sailak aztertuko ditu amaierako testuak ahalik eta adostasun maila handiena izan dezan. “Gure helburua da etorkizuneko ETEak araudi eta ingurumen mailako estandarrak betetzea eta, gainera, gure hiriko bizi-kalitatea hobetzeko tresna adostua eta eraginkorra izatea”.

Emisio Txikiko Eremua ezartzeak aldaketa positiboa ekarriko du hirirako, mugikortasun jasangarriagoa sustatuz, kutsadura gutxituz eta ingurumena gehiago errespetatzen duen hiri-garapeneko eredurantz aurrera eginez.

Partaidetza eta azterketa oinarri dituen lanketa horrekin, proiektu hau elkarrekin egindako ahaleginaren emaitza izango da eta, hala, inplikatutako sektore guztien beharrak islatu eta etorkizun garbia eta osasungarriagoa bermatu ahal izango du Udalak.

ETEa arautuko duen ordenantza osoko bilkurak behin-behinekoz onartu zuen azaroaren 15ean, eta orain herritarrek alegazioak aurkezteko fasea dago zabalik, behin betikoz onartu ahal izateko. ETEa martxan jarri ahal izateko, Europar Batasunak finantzatutako Susperraldi, Eraldaketa eta Erresilientzia Planaren baitan, Europako laguntza (NextGenerationEU) jaso da.