Gasteizko Zabalganan ibilgailuen zirkulazioa baretzeko neurri berriak abian dira

Gasteizko Udaleko Trafiko Zerbitzuak Zabalganako bi biribilgunetako zirkulazioa baretzeko lanak egin ditu orain gutxi, bertatik igarotzen diren ibilgailuen abiadura moteltzeko. Bi kasuetan, ibilgailu pribatuentzako errei kopurua murriztu eta abiadura gutxitzeko elementuak jarri dira.

Jarduera horiek inguruko bizilagunekin aldez aurretik egindako lanaren emaitza dira, eta, hala, auzogunearen eta gertuen bizi diren auzokideekin zuzeneko harremanaren bidez, erabilgarri dauden aukerak aztertu dituzte, Gasteizko Udaletik jakinarazi dutenez.

Horrela, Bremen kaleak eta Ozeano Barea kaleak bat egiten duten biribilgunean egin da lehen esku hartzea. Biribilgunearen sarreran, iparraldetik, erreiak hirutik bira gutxitu dira, eta toki horretan dagoen autobus geltokian ez da kalterik eragin. Hala, eskuinean geratzen den bidea autobus errei gisa erabili da, eta autoentzako bideak bitara murriztu dira. Era berean, bi kuxin berlindar jarri dira, zirkulazio abiadura murrizteko, eta pasatzen uzteko seinale bat, geltokitik irtetean autobusari lehentasuna emateko.

Beste esku hartzea Zabalgana hiribideak eta Ozeano Barea kaleak bat egiten duten biribilgunean egin da. Kasu honetan, Zabalgana hiribidetik biribilgunerako sarreran egin dute esku hartzea, egungo bidegorria aparkaleku ilara batekin babestuz. Hala, autoen zirkulazio eremua estutu da. Biribilgunearen beste aldean, irteeran, antzeko estutze lana egin da, baina lineako aparkaleku erreia zeharkako aparkaleku bihurtuta.

Gune horretako jarduketa osatzeko, inguruan egiten ari diren eraikuntza lanak amaitu bezain laster, abiadura murrizteko elementuak jarriko dituzte autoentzako erreietan, iparraldetik biribilgunera sartu aurretik.