Gasteizko Batailaren Monumentuaren egungo egoera zein den jakiteko azterketa zientifikoa hasi dute

Aste honetan hasi da Andre Maria Zuriaren plazako Gasteizko Batailaren Monumentuaren egungo egoera zein den jakiteko azterketa zientifikoa. Azterketak abuztuaren 23ra arte iraungo du, eta 18.030,40 euroko kostua izango du. Egun horietan, Petrak (enpresa esleipenduna) beharrezko egiaztapenak egin eta laginak in situ hartuko ditu. 

Sonia Díaz de Corcuera Kultura eta Hezkuntza zinegotziak adierazi duenez, “obraren kontserbazio-egoera eta narriaduraren arrazoi nagusiak zehaztuko ditu azterlan honek, eta tresna nagusia izango da monumentuaren kontserbazio-zaharberritze zientifiko integralerako proposamena egiteko behar diren erabakiak hartzeko”. Gainera, zaharberritu ondoren monumentua mantentzeko plana egingo da.

Lanak hainbat jarduera eremu izango ditu. Lehenengo fasean, monumentua kokatuta dagoen tokian, Andre Maria Zuriaren plazan, datuak hartu eta probak egingo dituzte. Ondoren, dagozkion laborategietan jasotako laginak aztertuko dira, eta bulegoko lana egingo da enpresa esleipendunaren instalazioetan. Era berean, enpresaren, Gasteizko Udaleko teknikarien eta Arabako Foru Aldundiko Zaharberritze Zerbitzuko Zuzendaritza Teknikoaren arteko harremana egongo da une oro, obrari buruzko informazio osagarria biltzeko, elkarlanerako sistema eta formatua erabiliz.

Monumentu-eskultura tamaina handiko obra da, 1813ko Gasteizko bataila omentzeko helburuarekin egindakoa. Oinarri karratua eta piramide forma oso luzea ditu.

Oinarria, lehen solairuko multzo eskultorikoa eta eusten dion egitura guztia hareharriz eginda daude. Bigarren solairuan, brontzezko multzo eskultorikoak inguratzen du harria, eta monumentuaren errematean brontzezko beste multzo eskultoriko bat dago.