VGBiziz zerbitzuak bizikletak aparkatzeko 917 toki eskaintzen ditu Gasteizen 14 aparkalekutan

VGBiziz bizikletentzako aparkaleku seguruen Gasteizko zerbitzua kudeatzen duen PVerde enpresak egindako azterketa baten arabera, Arabako hiriburua da aparkaleku kopuru handiena eskaintzen duen Estatuko hiria, gaur egun, 917 toki baititu hirian zehar dauden 14 aparkalekuetan banatuta, eta 221.445 bizikletak erabili dute noizbait plaza horietako bat. Martxan jarri zenetik 2.243 pertsonak deskargatu eta eskuratu dute PVerde aplikazioa.

VGBiziz zerbitzuak kaleko doako aparkalekuen sarea osatzen du, eta, prezio txikiaren truke, bizikletak eguratsetik babestuta eta seguruago dauden instalazioak eskaintzen ditu. Orotara, 14 aparkaleku daude sarean, besteak beste, Aldabe, Errota, Memoriala, Santa Barbara edo Unibertsitatea.

Beatriz Artolazabal Gasteizko Udaleko Espazio Publikoaren eta Auzoen zinegotziaren hitzetan, "bizikletak gure hirian eta politiketan lehentasunezko tokia izatea eta garraiobide horretan egindako joan-etorriak gero eta ugariagoak izatea nahi badugu, jendeari erabilera erraztu behar diogu, eta hori aparkatzeko toki seguruak erraztuz ere lortzen da".

Horrela, VGBiziz sarea hobetzen jarraituko dutela iragarri du, iglu eta lonja gehiagorekin. "Egindako azterketan egiaztatu dugunez, aparkaleku seguruek erabilera eta okupazio maila onak dituzte. Gasteiztarrek behin eta berriro babestu duten azpiegitura da. Horregatik da garrantzitsua gure lana ez etetea eta hiria bizikleta bidezko mugikortasunaren abangoardian egon dadin pausoak ematen jarraitzea", gaineratu du.

Gogorarazi duenez, aparkalekuen kopurua laster handituko da Erdi Aroko erdigunean bi lonja berri irekitzen direnean; horiei esker, 45 plaza gehiago izango ditu sareak. "Mugikortasun jasangarria eta osasungarria lortu nahi dugu, eta 2019tik martxan dagoen VGBIziz sarea horretarako lagungarria da. Hori guztia bizikleta erabiltzen dutenek bideratu dizkiguten eskaerekin lotuta dago", esan du.

Bestalde, PVerde enpresak egindako txostenean VGBiziz sareak ingurumena zaintzen egindako ekarpena ere aztertu du, eta, jasotako datuen arabera, instalazio horien erabilerari esker, atmosferara 247 tona CO2 igortzea ekidin da.

"Gobernu talde honentzat, betebeharra izateaz gain, aukera ere bada deskarbonizazioa. Mundu mailako erronka da, helburu handiak dituena, eta horrekin oso konprometituta gaude", ziurtatu du.