BILBAO. Euskal Herriko Unibertsitateko (EHU) Zientzia eta Teknologia Fakultateak Zientzia Fikziozko Alberto Magno Literatura Lehiaketaren 27. ekitaldiaren deialdia egin du. Kontakizunak euskaraz eta gaztelaniaz aurkez daitezke, eta lanak aurkezteko epea urriaren 19an amaituko da.
Aurten lehiaketak 2.000 euroko lehenengo saria eta 1.000 euroko bigarrena banatuko ditu, eta aurkeztutako kontakizunek gutxienez 15.000 hitz eta gehienez 25.000 izan beharko dituzte, EHUko iturriek prentsa ohar bidez jakinarazi dutenez.
Jatorrizko lanak (hiru ale) eskura eman ahal izango dira edo, bestela, postaz bidali Zientzia eta Teknologia Fakultatera (Dekanotza, 644 posta-kutxa, 48080 Bilbo). Posta elektronikoz ere bidali daitezke, ztf.kultura@ehu.eus helbidera. Epaimahaiaren erabakia abenduaren 18an jakinaraziko da, urte amaiera ospatzeko Zientzia eta Teknologia Fakultatean egingo den ekitaldian.
