asteizko eta Euskadiko familia gehienek bihar ekingo diote txikienak beren geletara itzultzeari. Nolakoak izango dira klaseak? Zer gertatuko da ikasle bat koronabirusaz kutsatzen bada? Zein dira abian jarri diren protokoloak? Nahikoak dira? Ideia ona al da ikasgeletara itzultzea? Berriro itxiko al dituzte ikastetxeak? Bihar ikastetxeak martxan jarriko diren arren, familia askok zalantzaz beteta jarraitzen dute. Lau ikastetxek beren protokoloak kontatu dituzte DIARIO DE NOTICIAS DE ALAVA egunkari honetan, eta guztiek mezu zuzena zabaldu nahi izan dute: ikastetxeak ixtea azken aukera izan behar da, klase presentzialak "ordezkaezinak" baitira. "Lan gogorra egin dugu ikastetxea egokitzeko. Jakin badakigu gaur egungo egoerak kezkatzen eta larritzen dituela familiak. Baina posible izan dugun guztia egin dugu koronabirusaren arriskuak gutxitzeko. Dena prest dugu ikasturte berriarekin hasteko". Aitor Perez de San Roman, Urkide ikastetxeko zuzendariarena da esaldia. Bere ikastetxean lantalde osoak lan-egun gogorrak daramatza Eusko Jaurlaritzaren protokoloa instalazioetan egokitzeko, baita protokolo zehatzagoak egiteko ere, berehalako kutsadurarik gertatuz gero ikastetxe osoa itxi behar ez izateko. Hala, bere lehen neurrietako bat, esaterako, eskolara itzuli aurretik, irakasle guztiei test serologikoak egitea izan da.
Beste neurri batzuk ere hartu dituzte. Batetik, ikastetxeko zuzendariak azaldu duenez, lan arriskuen inguruko aditu batekin trebatu dira covid formazio batean. Bestetik, ikastetxearen barrualdea seinaleztatu dute zenbait neurri gogoratzeko eta derrigorrezko sarrera eta irteera adierazteko eta eskolara sartzeko eta irteteko ordutegi mailakatu bat sortu dute. Horrez gain, burbuila taldeak sortu dituzte ikastetxe osoan. Burbuila taldeak deituriko neurria ikastetxe guztietan sortzen ari da sei urtetik beherako haurrentzat; kasu horietan, irakaskuntza ez da derrigorrezkoa, eta maskara erabiltzea ere ez; horregatik, taldeak isolatzen dituzte, eta ikastetxeko gainerakoekin kontaktua eragozten dute. Urkide ikastetxearen kasuan, talde guztientzako burbuila taldeak sortu dituzte. Gainera, momentuz behintzat, jantokia ixtea eta geletan jateko aukera ematea ere erabaki dute.
Ordutegi partzial edo osoei dagokienez, eskola guztiak goizez bakarrik jartzeko aukera eskatu diote Eusko Jaurlaritzari ikastetxe honetatik. "Neurri hori onartuko baligute, arazo asko konponduko lituzke. Eusko Jaurlaritzaren Hezkuntza Protokoloak dio, ahal dela, familia bakoitzeko pertsona bakar batek jaso eta utzi behar dituela haurrak. Lanaldia goizekoa eta arratsaldekoa bada, lau joan-etorri daude, eta, beraz, aukera hori zaildu egiten da", azaldu eta gaineratu du zuzendariak: "Lanaldi jarraitua egiteko aukera izango bagenu, hori erraztuko genuke; gainera, jantoki-zerbitzua eskainiko genuke eta, ondoren, zerbitzu horri zaintza- eta jagoletza-zerbitzu bat emango genioke, kostu gehigarririk gabe, kontziliazio bidez hala beharko duten familiek ordutegi osoa bete ahal izango lukete". Antzeko neurriak hartu dituzte Niño Jesús eta San Prudentzio ikastetxeetan.
Bi ikastetxeek Eusko Jaurlaritzan ezarritako protokoloa egokitu dute, baina, horrez gain, alderdi pertsonalagoak gehitu dituzte. Carmen Panequek, zuzentzen duen Niño Jesús ikastetxean, jantokia zabaltzea erabaki dute, ikasleei distantzia eta espazio gehiago sortzeko. Aste honetan zehar, adinaren araberako protokoloak prestatzen eta eskolako autobusaren protokoloa prestatzen ere aritu dira. Adibidez, maskara sei urtetik beherakoentzat ere jartzea gomendatzen dute. Burbuila gelak ere sortu dituzte, batez ere adinagatik derrigorrezko maskara erabiltzen ez duten adingabeentzat. Ez hori bakarrik. Prest dute online plataforma bat etxean isolatuta egon behar duten eta klaseak arazorik gabe jarrai ditzaketen ikasleentzat. "Ziurgabetasun-giroa orokorra da lankideen eta familien artean. Jakin badakigu, neurri guztiak izan arren, egoera kaotikoa izan daitekeela neguan dauden gaixotasunengatik. Lan zaila datorkigu, baina nire ustez ikastetxeak leku seguruak dira eta oso ondo prestatuta daude datorrena datorrela", esan du zuzendariak.
San Prudentzio ikastetxetik antzeko iritzia dute. Asteak daramatzate dena prestatzen ikastetxea berriro irekitzeko. Mikel Gastañares zuzendariak adierazi duenez, ahal den neurrian, aire zabaleko espazioez gozatzen eta ahalik eta banaketa gehien egiten saiatuko dira. Gainerako ikastetxeetan bezala, taldeetan ordutegi desberdinak ezarri dituzte sarrerak eta irteerak mailakatuta egiteko, higiene- eta antolaketa-neurriez gain. Egindako lan horren guztiaren ondorioz, ikastetxe honetan behintzat, egoera baikor ikusten dute: "Baikorra naiz. Aurrekaririk ez duen egoera baten aurrean gaude, baina dena ondo joango dela uste dut. Niretzat garrantzitsuena umeek eta nerabeek klasetara itzultzea da: hau da, irakaskuntza presentziala ordezkaezina dela iruditzen zait. Klase presentzialetara etortzeak haurrak soziabilizatzen laguntzen du, baina baita trebeagoak izaten eta maila akademikoa hobetzen ere. Ez naiz medikua, ez ditut auzi medikoak ulertzen, baina bai hezkuntza kontuak, eta iruditzen zait irakaskuntza presentziala ordezkaezina dela. Ez dira trebetasun berdinak lortzen etxetik edo irakaskuntza presentzialarekin".
"Lan gogorra egin dugu ikastetxea egokitzeko; posible izan dugun guztia egin dugu"
Urkide ikastetxeko zuzendaria
"Lan zaila datorkigu baina, nire ustez, ikastetxeak leku seguruak dira"
Niño Jesus ikastetxeko zuzendaria
"Irakaskuntza presentziala ordezkaezina dela uste dut"
San Prudentzio ikastetxeko zuzendaria
"Gogoz eta ilusioz irekiko dugu berriro ikastetxea. Ikasle guztiak babestu behar ditugu"
Jesusen Bihotzeko zuzendaria
DERRIGORREZKOA EZ DEN HEZKUNTZAKO BAJAK
Jesusen Bihotza ikastetxeko zuzendariak aitortu du "posible" dela guraso batzuek matrikulan baja ematea
- Iñigo Urkullu lehendakariak argi utzi zuen duela egun gutxi; guraso guztiek eskolara eraman beharko dituzte seme-alabak, bestela, espetxe zigorrari aurre egin diezaiokete. Baina, zer gertatzen da derrigorrezko hezkuntza egin behar ez duten haurrekin? Kasu horietan bajak areagotu egin dira? Jesusen Bihotza ikastetxetik Nieves Maya zuzendariak helarazi duenez, momentuz, ez da ohikoa gurasoek matrikulan baja ematea. Onartzen du guraso batzuk egoeraren beldur direla, baina, hasieran behintzat, ikastetxeengan konfiantza izatearen alde egin dute. "Bajaren bat egongo da, baina bi urteko seme-alabak dituen eta semea eskolara inoiz ekarri ez duen aitaren batena izango da. Beste urte batzuetan seme-alabak ekarri dituzten eta orain lau edo bost urte dituzten umeen gurasoek ez diete baja emango. Eskola ezagutzen duten gurasoak dira eta eskola umeentzat zein garrantzitsua den badakitelako", esan du.
Ikastetxean protokolo espezifikoak ezarritako neurriei dagokienez, nabarmentzekoa da urruntzearen eta antolaketaren alde egiten ari diren ahalegina: "Lau txandatan antolatuko gara, ziklo bereko pertsonak mailaren arabera bereizita joan daitezen. Hau da, bizikidetza-burbuilak mailaka sortu ditugu. Ahal dugun guztia egiten ari gara koronabirusak zentroan izan dezakeen inpaktua minimizatzeko", aitortu du.
Gainera, ikastetxe honetan aireztapen iraunkorra ere badute (barruko airea berritzen duen sistema). "Gogoz eta ilusioz irekiko dugu berriro ikastetxea. Irakasleok egin ditugu infekziotik libre gaudela jakiteko testak, orain gure ikasle guztiak babestu behar ditugu eta".
