Niño Jesus ikastetxeko eskolaz kanpoko jarduerak ikastetxeko guraso-elkarteak eta Odei Calzon eskolaz kanpoko kirol-jardueren koordinatzaileak elkarlanean antolatzen dituzte. Baina hau ez da jardueren hasierarekin gelditzen den lana. Etengabeko balorazioko lana da, eta hainbat bilera egiten dira ikasturtean zehar, jardueren egunerokotasuna baloratu ahal izateko, eta, horrela, dagozkion hobekuntzak egin ahal izateko hurrengo ikasturteari begira.
Hautatuenak
Azken ikasturteetan hobekien funtzionatzen ari diren jarduerek «oinarrizko jarduera multzo» bat osatu dituzte, eta, haien arrakasta dela-eta, errepikatu egiten dira urtez urte. Ildo horretan, ikastetxeak hainbat urte daramatza jarduera hauek eskaintzen, kirol tipikoenak barne hartzen dituztenak: multikirola, gimnastika erritmikoa, saskibaloia, futbola... baina horrek ez die bidea ixten jarduera berriei, eta denboran zehar jarduera berriak eskaintza horri gehitu zaizkio, hala nola patinak edo karatea.
Berritasunak
Azken hauen berritasunak eragin du arrakasta handia izatea eta eskolaz kanpoko ikasleen artean hautatuenetakoak izatea. Horrela, patinajeak eta karateak 25 ikasle inguru dituzte jarduera bakoitzean izena emanda, «Egia esan, ezusteko atsegina izan zen inskripzioak ikusi genituenean», aipatzen du Odeik.
Eskaintza
Jardueren eskaintza prestatzeko AMPArekin egiten diren bileretan, batez ere familien eta haurren eskaria hartzen da kontuan, eta koordinatzailearen hitzetan, «AMPArekin egiten diren bileretan, hurrengo urteari begira egin daitezkeen jarduera berriak baloratzen ditugu, baina egia da ikastetxe ez oso handia izanik, jarduera asko ez ateratzen saiatzen garela, talde oso txikiak gera ez daitezen, jarduerak aurrera eramatea eragotz ez dezaten».
Onurak
Eskolaz kanpoko kirol-jardueren bidez, jarduera horietan parte hartzen duten ikasleak mugimenduz, sozialki eta kognitiboki gara daitezen bilatzen da. «Bestalde, jarduerek ikastetxeak gure ikasleei irakatsi nahi dizkien balioak transmititzen laguntzen dute», nabarmendu du Odeik, eta gaineratu du: «funtsezkoa iruditzen zaigun beste puntu bat da beren motxiletan gordetzen dituzten lagunak eta esperientziak, ikastetxearen eta kirolaren eskutik».
