Larunbat honetan Legution amaitutzat eman genuen udako denboraldia, edo, deitzea nahiago dudan bezala, multitxirrindularitza denboraldia, proba oso azkar eta tekniko batekin. Zergatik multitxirrindularitza? Izan ere, martxotik urrira eskolek, dinamika ezberdinen bidez, errepideko/ibilbideko bizikletarekin, mendiko bizikletarekin/BTTrekin eta oztopo-zirkuituekin/Gymkanarekin entrenatzen baitugu.
Balorazioa
Denboraldia martxoan hasi genuenetik urrira arte esan dezakegu hazteko sasoia izan dela eskolentzat eta federazioarentzat. Urriaren 12an, sailkapeneko azken proba puntuagarrian, 197 pertsona zeuden izena emanda prebenjamin, benjamin, kimu eta haur kategorietan, benetako errekorra Arabako txirrindularitza eskolentzat.
Euskadiko Eskolarteko Jokoetan txapeldunen 6 maillotetatik 5 lortu genituen, eta beste hainbeste postu on. Aurten Arabako Txirrindularitza Federazioak antolatu du jardunaldia, Arabako txirrindularitza eskolen laguntzarekin. Azpimarratzekoa da federazioa aitzindaria izan zela Euskal Herrian jokatu ziren hainbat proba antolatzen, eta harrera bikaina izan zutela.
Guztion lanari esker, erlojupeko probak sartu ditugu eskoletan, bai errepidean, bai mendian. Era berean, aurreko zirkuituei eusten jarraitzen dugu. Datu hori oso garrantzitsua da, eta antolatzaile guztiei eskertu behar zaie egindako lana.
Amaierako jaia
Izenak berak dioen bezala, txirrindularitzaren jaia da Araban, eta bertan gure arabar kirolari gazteek euren trebetasuna bizikletaren gainean erakusteko aukera dute. Aurten Legution ospatu dugu, eta, gainera, Legutioko Txirrindulari Elkartearen eskutik txirrindularitza eskola berri baten sorreraren berri izan dugu.
Zorte handia izan genuen Oier Lazkano Movistarreko txirrindulari arabarrarekin, eskatzen diogun bakoitzean ohikoa den bezala. Ikasleek berarekin egoteko aukera izan zuten probak iraun zuten bitartean, eta gero modu aktiboan parte hartu zuen dominen eta sarien banaketan.
Neguko denboraldia
Azaroaren 5ean berriz hasiko gara ziklo-krosarekin Artomañan, urtarrilaren 21ean Laudion amaitu arte, eta Lezaman, Izarran, Zabalaingo penintsulan, Amurrion, Artziniegan eta abarretan egingo diren probaz gozatuko dugu.
"Urte honetan neska asko gaude, oso interesgarria egon da"
Festan parte hartu zuten txirrindulari batzuek euren denboraldia nolakoa izan den kontatu digute:
Hau da denboraldiaren amaiera, azken festa, nolakoa izan da denboraldia?
Laia: Niri iruditu zait oso ondo egon dela, eta denok oso ondo pasatu dugu bata bestearen kontra korrika egiten.
Matixa: Bai, eta gainera urte honetan neska asko gaude, oso interesgarria egon da, eta gainera egin dugu talde oso ondo, oso denboraldi ona izan da.
Uxue: Denboraldi hau oso ondo egon da, polita izan da, aber hurrengo urtean.
Denboraldiak izan dituen proben artean, ba al da baten bat bereziki gogoratzen duzuena?
Uxue: Aurreko egunean, nire taldeko batek eta biok entrenamenduetan hitz egiten prestatu genuen taktika bat eta irabazi zuen.
Laia: Nire lasterketarik gogokoena izan da hau, ez dut kolaboratu nire taldearekin, kolaboratu dut beste mutil batekin, eta nik irabazi dut nesken lasterketa eta beste mutila geratu da laugarrena, baina oso pozik bukatu du lasterketa.
Matixa: Ez dakit, guztiak egon dira oso ondo, batzuk hobeagoak, beste batzuk txarragoak, baina oso ondo egon dira.
Haizea: Denboraldiaren lehenengoa, zeren irabazi nien mutilei, eta pozik nengoen.
