Suteak prebenitzeko lanak hasi ditu Arabako Aldundiak Izkiko Parke Naturalean

Arabako Foru Aldundiak suteak prebenitzeko zenbait esku hartze jarri ditu martxan Izkiko Parke Naturalean, Arabako Parke Naturalen Helmugako Turismo Jasangarritasuneko Planaren baitan, Europar Batasunak NextGenerationEU funtsen bidez finantzatutako Berreskuratze, Eraldaketa eta Erresilientzia Planaren esparruan.

Foru erakundeak jakinarazi duenez, ekimenaren helburu nagusia da biodibertsitatearen babesa indartzea eta naturguneak sute arriskuaren aurrean duen erresilientzia handitzea, parkearen arau dokumentuetan jasotako mehatxu nagusietakoa baita.

Horretarako, suebaki zerrenda osagarriak sortzen ari dira Izkiko baso bide nagusietan oinarrituta; zehazkiago, Y Izki pistan (Apilaiz, Markinez eta Urturi artean) eta Plenope pistan (Zurruma Kanpezun) egiten ari dira lanak.

Esku hartzeen helburua da "suteak daudenean eraginkortasuna hobetzea eta sua zabaltzea oztopatzea, parkean lehendik dauden egitura linealak aprobetxatuta", Saray Zarate Ekonomiaren Garapenaren eta Jasangarritasunaren Saileko diputatuak azaldu duenez.

Gainera, soberan edo gaizki eratuta dauden zuhaitzak kenduko dira, erregai karga murrizteko, itzalari eutsita eta dobela gehiegi irekitzea saihestuta, bai eta 2,5 metrora arteko adar baxuak ere, erregaiaren jarraitutasun bertikala murrizteko.

Era berean, lanetan sortutako hondakinak jaso, hesitu edo birrinduko dira, eta mehazketen ondoriozko zura modu seguruan sailkatu eta pilatuko da. Gainera, sastrakak eskuz edo modu mekanizatuan kenduko dira zerrenda osagarri osoan.

Lanak hasita daude dagoeneko eta datozen asteetan gauzatuko dituzte. Izkiko parke naturalaren kontserbazioa bermatzeko eta bisitarien, erkidego mugakideen eta ekosistemaren beraren suteen aurkako segurtasuna hobetzeko planifikatutako neurrien parte dira jarduerak.

Foru Aldundiko Natura Ondarearen Zerbitzuak aldi honetan parkea bisitatzen dutenen laguntza eta ulermena eskertu ditu, eta teknikarien jarraibideei eta seinaleztapenari jaramon egitera gonbidatu ditu, ingurunearen segurtasuna eta kontserbazioa bermatzeko.