Arabako Aldundiak 70.180 euro inbertituko ditu Artziniegako zeharbidea hobetzeko

Arabako Foru Aldundiak Artziniegako herrigunetik igarotzen den A-624 errepidea egokitzeko eta urbanizatzeko proiektuaren idazketa lizitatu du, 70.180 euroko aurrekontuarekin eta sei hilabeteko gauzatze epearekin. Esku hartzearen helburua da segurtasuna indartzea eta ia kilometro bateko tartea modernizatzea.

Jon Nogales Mugikortasun Jasangarriaren eta Bide Azpiegituren foru diputatuak azaldu duenez, zeharbideren erreformarekin "trazadura, bidezorua eta seinaleak berrituko ditugu, baita espaloiak handitu eta argiteria, saneamendu sareak eta autobus geltokiak jarri ere. Jarduketa horiekin segurtasun eta erosotasun handiagoa lortuko dugu, bai gidarientzat, bai oinezkoentzat".

Nogalesek zehaztu du foru erakundearen helburua dela proiektua 2026aren erdialdean onestea eta obrak urtea amaitu baino lehen lizitatzea, esleitzea eta hastea.

Jarduketa Arabako Errepideen Plan Integralean jasota dago, eta A-624 errepidearen 860 metroko tartean egingo da, A-2604 errepidearekiko (Sodupe-Bizkaia) bidegurutze biribilgunearen eta A-2602 errepidearekiko (Trespaderne-Burgos) bidegurutze biribilgunearen artean.

Proiektuak zeharbidea egungo mugikortasun eta segurtasun beharretara egokitzeko irtenbide tekniko egokienak definituko ditu, eta horrela, trazadura eta zoladura berrituko dira, indarrean dagoen araudia eta hirigintza plangintza betez, eta saneamendu eta hornidura sareak eguneratuko dira, haien edukiera egungo eskarira egokituta.

BIDEGURUTZEAK

Era berean, elektrizitate eta telekomunikazio lineak lurperatuko dira, aireko bidegurutzeak kenduz eta hiri estetika hobetuz, eta argiteria publikoa erabat eraberrituko da, teknologia eraginkorra eta jasangarria txertatuz. Orobat, espaloiak handitu, aparkalekua berrantolatu eta oinezkoen irisgarritasuna hobetuko da, ibilbide seguruak bermatuz.

Gainera, itxiturak berrituko dira, hiri altzariak jarriko dira, garraio publikoko geralekuak jarriko dira eta berdeguneak lehengoratuko dira, paisaia integrazioa eta ingurumen kalitatea bermatuz.

Nogalesek adierazi du hiri zeharbideen hobekuntza Arabako Aldundiaren estrategiaren "ardatzetako bat" dela, "errepideen foru sarea bide segurtasuna lehentasun gisa hartuta modernizatzeko asmoz".