Arabako Foru Aldundiak laguntza lerro berria jarri du abian, lankidetzaren esparruan giza eskubideen alde lan egiten dutenak babesteko ekimenak egiten dituzten lurraldeko eta Trebiñuko enklabeko irabazi asmorik gabeko elkarte eta erakundeentzat. Deialdia irekita dago, eragiteko eta giza eskubideen defendatzaileak babesteko Arabako mekanismoaren esparruan, eta 40.000 euroko zuzkidura du.

Foru erakundetik jakinarazi dutenez, lankidetzarekin lotutako esku hartzeen esparruan giza eskubideak eta oinarrizko askatasunak modu baketsuan sustatzen, babesten eta gauzatzen dituen pertsona ororen eraginarekin eta babesarekin lotutako ekintzetara zuzenduta dago deialdia, banakakoa edo kolektiboa izan.

Arreta berezia eskainiko zaie, besteak beste, ingurumenaren eta lurraren aldeko defentsan eta garapeneko megaproiektuen aurka ari direnei, herri indigenen eta sexu eta ugalketa eskubideen aldeko defentsan edo indarkeriaren aurka dihardutenei, sexu orientazioarekin eta genero identitatearekin lotutako eskubideen defendatzaileei, komunitateetako kazetariei eta lan eskubideen alde eta salerosketaren biktimen eta errefuxiatuen alde dihardutenei.

DIRU LAGUNTZEN LERRO BERRIA

Diru laguntzen lerro berriak bat egiten du Berdintasun, Euskara eta Gobernantza Sailak lankidetzaren arloan 2025ean abian jarri dituen laguntzekin. Horretarako, hainbat laguntza deialdi egin ditu, guztira 485.000 euro batzen dutenak.

Horrela, irekita daude elkarte sarea indartzen laguntzen duten jarduerak eta genero ikuspegidun gizarte eraldaketarako hezkuntza proiektuak babesteko laguntzak, bai eta 'Eskutik 2022-2025' esparru dokumentuan lankidetzarako eta elkartasunerako politika publikorako lehenetsitako ikuspegietako batzuei erantzuten dieten ekimenak babestekoak. Laguntza horien guztien aurrekontua 145.000 euro da.

Halaber, dagoeneko eska daitezke garapenerako lankidetzako urteko ekintza puntualak finantzatzeko laguntzak. Ekintza horiek pertsona eta erakunde guztiek 2030 Agenda berriarekin eta garapen jasangarriko helburuekin izan beharreko konpromisoan eragina izan behar dute. Diru laguntza horretarako, 120.000 euroko aurrekontua dago.

Azkenik, urte osoan irekita dago Larrialdietarako Arabako Funtsaren esparruko proiektuen deialdia, Arabako Foru Aldundiaren 180.000 euroko ekarpenari esker bide ematen diena eraginpeko erakundeei laguntza ematea garapen bidean diren herrialdeei eragiten dieten larrialdietan, dirulaguntza arin bideratuz gertatu den larrialdi zehatzean esku hartzeko gaitasun egiaztatua duten erakundeei, erakunde horiek aldez aurretik eskatuta.