Araban izango da XX. Bernaola Zikloa urriaren 14tik otsailaren 3ra

Musika Garaikidearen Nazioarteko Zikloaren XX. edizioa, Bernaola Zikloa, Araban izango da urriaren 14tik otsailaren 3ra. Guztira 13 kontzertuk osatzen dute programa; horietako gehienak Gasteizen izango dira, baina baita, aurreko bi edizioetan bezala, Araian eta Bilbon ere.

Ekitaldia aurkezteko prentsaurrekoan Ana del Val Kultura eta Kirol Saileko diputatua, Sonia Díaz de Corcuera Hezkuntza eta Kulturako zinegotzia, Arantxa Ibañez de Opacua Vital Fundazioko zuzendaria eta Guillermo Lauzurika ekitaldiko zuzendaria izan dira.

Ensemble Sinkro taldeak irekiko du programa, urriaren 14an (larunbata), Jesús Guridi musika kontserbatorioan eta Akusma taldeak itxiko du otsailaren 3an, han bertan. Zikloan izango dira, besteak beste, Iñaki Estrada, Anthony Pateras, Katharina Gross, María Scaroni eta Zuriñe Benavente.

Jarduera gehienak beti bezala Jesús Guridi Kontserbatorioan egingo dira, baina horietako hiru Artiumen, Araiako Andra Mari Aretoan eta Bilboko JC Arriaga Musika Kontserbatorioan izango dira.

Kontzertu guztiak doakoak izango dira, eta sarrera librea dute, aretoaren edukiera bete arte, urriaren 22koak izan ezik. Kontzertuen kostu sinbolikoa 7 euro izango da.

Alfonso García de la Torre konpositore, irakasle eta kultura kudeatzailearentzako omenaldia ere izango da; "Haren oroimenez, eta urte hauetan guztietan Bernaolaren sortzaile eta alma materra izan den horri eskerrak emateko", adierazi du Lauzurikak. Fernando Martínezen "De memoris, ibilbide baten esentzia" izeneko argazki erakusketa ere egingo da. Jesús Guridi Kontserbatorioan egongo da ikusgai, lehenengo kontzertuaren egunetik azkenaren egunera bitartean.