- Arabako Foru Aldundiak eta gure lurraldeko Lanbide Heziketako Egibide eta Ikaslan Araba zentroek zentro horietako irakasleei zuzendutako zibersegurtasunean espezializatutako prestakuntza diseinatzea adostu dute. “Alor horretan espezializatutako Osane Consulting Arabako konpainiako profesionalek 130 orduko prestakuntza emango dute, aurrez aurre eta 4.0 industrian bereziki”, azaldu zuten atzo Aldundiatik. Gainera, ekimenak prestakuntza diseinatzeko eta material didaktikoak garatzeko jarduerak biltzen ditu, baita 2021ean prestakuntza espezializatua abiarazteko beharrezkoak diren ekipamenduak erosteko jarduerak ere.
“Ekimenaren helburua bikoitza da: Arabako industria-ingurunean Zibersegurtasunaren gakoak zabaltzea, batez ere arriskuak eta mehatxuak, eta enpresen heldutasun-maila handitzeko neurri zehatzen aplikazioa sustatzea”, jakinarazi zuten.
Arabako Aldundiak proiektua babestu eta finantzatzen du, eta espero du lankidetza publiko pribatu berri horrek lurraldeak Zibersegurtasuna bezalako gai estrategiko batekiko erakutsi duen sentsibilitatea eragingo duela, “eraldaketa digitaleko edozein prozesutan giltzarria baita”. Programak zortzi irakaslek hartuko dute parte, lau ikastetxe bakoitzeko, eta lau asteko iraupena izango du. Bi fasetan emango da: ekainaren 22tik uztailaren 10era, eta iraileko azken astean.
“130 prestakuntza-ordu horietatik, gutxi gorabehera % 30 industriara eta haren prozesuetara bideratuko dira berariaz, eta gainerako gaiak sektore horren
zeharkako gaiak izango dira. Gainera, orduen % 80 praktikoak izango dira, eta horrek, zalantzarik gabe, irakasleen artean kontzeptuen asimilazioa bizkortuko du, gerora etorkizuneko profesionaletara eramateko”, azpimarratu zuen Lorenzo Diaz de Apodaca Osane Consulting enpresako bazkide zuzendariak.
“Zibersegurtasunaren aldeko apustua ez da berria Lanbide Heziketako ikastetxeetan, pixkanaka inplementatzen ari baitira zenbait heziketa-ziklotan.Oraingo honetan, ordea, bere errektoreek urrats bat gehiago eman nahi izan dute, irakasleak programa zehatzago eta profesionalago batekin trebatuz”, gaineratu zuten.
